धार्के-सितापाइला सडक धमाधम कालोपत्रे

धादिङ । धार्के-सितापाइला सडक धमाधम कालोपत्र भईरहेको छ ।

धुनीवेसी नगरपालिका वडा नं. ५ को कार्यालय अमलेचौरदेखि ठुलोखोलासम्म नौ किलोमिटर सडक कालोपत्रे गर्ने योजना अनुसार धमाधम काम भईरहेको गोरखकाली कन्स्ट्रक्सन एण्ड मल्टी प्रोपव्ज कम्पनी प्रालिका प्रतिनिधि रामचन्द्र न्यौपानेले बताउनुभयो ।

यस सडक खण्डको कालोपत्रे गर्न भिमेश्वर ड्रिलिङ तथा निर्माण सेवा प्राइभेट लिमिटेडले २०८१ असार २२ गते निर्माण कार्य सक्ने गरी २०७९ असार २३ गते सडक डिभिजन नुवाकोटसंग सम्झौता गरेको हो ।

संघीय सरकारको भौतिक पूर्वाधार तथा यातायात मन्त्रालयको बजेटबाट निर्माणाधिन सडक भिमेश्वर ड्रिलिङ तथा निर्माण सेवा प्राइभेट लिमिटेड र गोर्खा एग्रोप्रिरेड प्रालिले निमाृर्ण कार्य जिम्मा लिएको थियो ।

भिमेश्वर ड्रिलिङ तथा निर्माण सेवा प्राइभेट लिमिटेडबाट सडक कालोपत्रे गर्ने जिम्मा सव कन्ट्रयाकमा गोरखकाली कन्स्ट्रक्सन एण्ड मल्टी प्रोपव्ज कम्पनी प्रालिलाई दिएको थियो ।

तोकिएको समयमा निर्माण तथा कालोपत्रे गर्ने काम नसकिएपछि २०८१ मंसिर १५ गतेसम्मलाई म्याद थप गराई निर्माण कार्यलाई द्रुतगतिमा अघि बढाइएको न्यौपानेले बताउनुभयो ।

विविएम र आक्सफाल प्रविधिबाट कार्तिक ४ गतेबाट काम शुरु गरिएको र यहि मंसिर १५ गते भित्र सक्ने योजना अनुसार काम भईरहेको सडक डिभिजन नुवाकोटाका इन्जिनियर पुरुषेत्तम भण्डारीले बताउनुभयो ।

कालोपत्रेको समयमा अति आवश्यकीय सवारी साधन बाहेक अन्य सवारी आवागमनमा अर्को सुचना प्रकाशित नभएसम्मका लागि वडाले रोक लगाएको छ ।

त्रिभुवन राजपथको नागढुंगा नौविसे सडक खण्डको चापलाई घटाउन २०४५ सालतिरबाट निर्माण गरिएको धार्के–सितापाइला सडक सडक २४ किलो मिटर मात्र रहेको छ ।

आउने असारसम्म बाँकी रहेका खण्डहरु पनि कालो पत्रे हुने बताईएको छ ।

यस सडक खण्डको १० किलोमिटर भाग काठमाण्डौ जिल्लामा पर्छ । काठमाण्डौ तर्फ ७५० मिटर कालो पत्रे गर्न बाँकी रहेकोमा अहिले काम भइरहेको छ ।

धादिङ खण्डमा १४ किलोमिटर पर्छ । ५०० मिटर पिच गर्ने काम ठेक्का लगाउन बाँकी छ । बाँकी काम पुरा गर्न चालु आवमा नै सक्ने गरी ठेक्का निकाल्ने तयारी रहेको छ । चालु आ.व.मै धार्के–सितापाइला सडक २४ किलो मिटरमा कालो पत्रे पुरा हुने ईन्जिनियर भण्डारीले बताउनुभयो ।

यो सडकको परिकल्पना गर्नेले त्रिभुवन राजपथ नौविसे–नागढुंगा उकालोमा हुनसक्ने सम्भावित ट्राफिक जामलाई अनुमान गरेर गरेको हुनुपर्छ ।

सडकको ट्रयाक खोल्ने काम सकिएको ३० वर्षसम्म यो सडक केन्द्रीय सरकारको प्राथमिकतामा नपर्दा यात्रुहरुले वर्षैदेखि नागढुंगाको जाममा रोकिन मात्र परेन । गत असोज १२ गते ३५ जना यात्रुले ज्यान समेत गुमाउन पुगे ।

धादिङ जिल्लाको पूर्वि क्षेत्र अर्थात काठमाण्डौसँग सिमाना जोडिएको धुनीवेसी नगरपालिका भएर राजधानीलाई जोड्ने मुख्य र सहायक राजमार्ग जान्छन ।

धार्के–नागढुंगा करिव १४ किलो मिटर साविकको नौविसे गाविस अर्थात धुनीवेसी नगरपालिका वडा नं. ६, ७, ८ र ९ मा पर्छ ।

यसैगरी धार्के– सितापाइला १४ किलोमिटर सडक धुनीवेसी नगरपालिका वडा नं. ६, ५, ३, २, हुदै काठमाण्डौ जोड्छ ।

धार्के– सितापाइला सडक खण्डको ठुलो खोलाबाट भिमढुंगा लामिडाँडा सडक अन्तरगत धुनीवेसी नगरपालिका वडा नं. १ र ४ हुदै थाक्रे गाउँपालिकाको वडा नं. ९ र १० र गल्छी गाँउपालिकाको वडा नं. ८ र ७ गल्छी पुग्छ ।

धुनीवेसी र थाक्रेका किसानहरुले यी तीनवटै सडकको अधिकतम् उपभोग गरिरहेका छन् ।

यहाँ उत्पादन भएका ताजा तरकारी तथा फलफूल र दुधलाई काठमाण्डौका उपभोक्तालाई बेचेर जीविकोपार्जन गरेका मात्र छैनन् । धेरैथोरै आर्थिक उन्नती पनि गरेका छन् ।