एमाले धादिङको प्रतिनिधि परिषद्मा उपाध्यक्ष पोखरेल भने,‘पार्टीको चार एजेण्डा कार्यन्वयन गरौ’

धादिङ,१७ असार।
नेकपा एमालेका उपाध्यक्ष इश्वर पोखरेलले एमालेले लिएको चार एजेण्डालाई कार्यन्वयन गर्न आग्रह गर्नुभएको छ।

शनिबार धादिङबेशीमा भएको एमाले धादिङको प्रथम जिल्ला प्रतिनिधि परिषदलाई सम्बोधन गर्दै उपाध्यक्ष पोखरेलले पार्टीको चार एजेण्डालाई कार्यन्वयन गर्न आग्रह गर्नुभएको हो।

उहाँले एमाले गौरवशाली इतिहास बोकेको र भविष्य योजना वर्तमानमा कार्यन्वयन गर्ने क्षमता भएको पार्टी भएको बताउनुभयो । आर्थिक समृद्धि, राष्ट्रियता, सामाजिक एकता र देश बनाउने जागरणको एजेण्डा एमालेको भएकोले व्यवहारमा कार्यन्वयन गर्नका लागि पार्टी कार्यकर्ताहरुलाई आग्रह गर्नुभएको छ।

सबै जाती धर्म समूदायको विविधतामा एकता एमाले एजेण्डा भएपनि एमालेलाई सिध्याउनका लागि पहिचानबादीको नाममा एमाले विरुद्ध मानिसहरुलाई उचालेको उपाध्यक्ष पोखरेलको भनाइ छ।

एमाले तिन तरेलीको नेतृत्व विकास गर्नका लागि ४० वर्ष माथी, ३० देखी ४० वर्ष र ३० वर्ष मुनिको नेतृत्व विकासका लागि रणनितिक रुपमा संगठन विकास थालेको पनि बताउनुभयो।

यस्तै कार्यक्रमलाई सम्बोधन गर्दै नेकपा एमाले धादिङका इन्चार्ज धर्मदत्त देवकोटाले पार्टी सुदृढिकरण अभियान संगै सशक्क्त बनाउन एकजुट भएर लाग्न एमाले कार्यकर्ताहरुलाई आग्रह गर्नुभयो ।

एमाले जिल्ला अध्यक्ष भूमि त्रिपाठीको अध्यक्षतामा सम्पन्न जिल्ला प्रतिनिधि परिषदले आगामी कात्तिक सम्म जिल्ला अधिवेशन,चैत सम्म पालिका अधिवेशन र त्यसपछि वडा टोल अधिवेशन गर्ने निर्णय गरेको छ।

४ सय ५० जिल्ला प्रतिनिधि परिषद सदस्यीय सहभागि बैठकले युवाहरुलाई पार्टीमा ल्याएर ४० प्रतिशत युवाको सहभागिता गराउने, राजनितिक प्रशिक्षण दिने, र बामपन्थी बहश संचालनका लागि पुस्तकालय संचालन गर्ने निर्णय गरेको छ।

जिल्ला प्रतिनिधि परिषदले पार्टीको इतिहास लेख्नका लागि जिल्लाका पार्टी जिल्ला संस्थापक जगन्नाथ नेपालको संयोजकत्वमा समिति समेत गठन गरेको छ। जिल्ला प्रतिनिधि परिषद्ले समसामयिक ९ बुँदे प्रस्ताव समेत पारित गरेको छ।