सिद्धलेकका तिन दल आन्दोलित : आर्थिक हिसाब नदेखाएसम्म गाउँसभा हुन नदिने चेतावनी

धादिङ । सिद्धलेक गाउँपालिकाका तिन वटा राजनितिक दल आन्दोलित भएका छन्।

आर्थिक पारदर्शिताको विषयमा व्यापक गुनासो आएको सिद्धलेकमा अध्यक्ष परशुराम खतिवडाले अपारदर्शी काम गरेको भन्दै गाउँपालिकाको कार्यपालिकामा सहभागी तिन दल आन्दोलित भएका हुन् ।

गाउँपालिकाको दहत्तरबहत्तर ठेक्का बाहेकको रकम उठाएर पनि गाउँपालिकामा जम्मा नगरेको र गतवर्ष नै गाउँपालिकाको खातामा रकम जम्मा गर्न १७ लाख ३३ हजार ५ सय ५० रुपैयाँ पालिकाको खातामा जम्मा नगरेको आरोप लगाउँदै मुख्य तिन दल आन्दोलनमा उत्रिएका छन् ।

१५ जना मध्ये ११ कार्यपालिका सदस्यले विपक्षमा लागेपछि आफूले गरेका अनियमितताबारे सार्वजनिक हुन थालेका कारण सिद्धलेक गाउँपालिकामा प्रेस विज्ञप्ती, वाकयुद्ध र आरोप प्रत्यारोप शृंखला चलेको छ भने गाउँपालिका अध्यक्षविरुद्ध जिल्ला प्रशासन कार्यालयमा सुशासनका लागि अनियमितता विरुद्ध उजुरी समेत परेको छ ।

वडा नम्बर ७ बाट निकासी भइरहेको खानीजन्य पदार्थ दहत्तरबहत्तर ठेक्का बाहेकको वातावरण शुल्क समेत गाउँपालिकामा जम्मा नभएको र बालुवा निकासी गर्ने ठेकेदारले अनियमित रुपमा उठाएर आम्दानी गरेपनि सरकारी खातामा नआएपछि अनियमितता विरुद्ध लागेको नेकपा एमाले सिद्धलेक गाउँपालिका अध्यक्ष रामहरि बराकोटीले बताउनुभयो ।

पटक पटक गाउँपालिका अध्यक्ष खतिवडालाई सचिनका लागि लिखित रुपमा र मौखिक रुपमा आग्रह गर्दा पनि नमानेपछि उपाध्यक्ष सबिता अर्याल सहितको १२ जनाको कार्यपालिका सदस्यले यसअघि बैठक बसी अनियमितताबारे उल्लेख गर्दै कारबाही गर्न र पालिकाको विभिन्न काम अनियमितता भएकोले ठेक्का लगायतका काम रोक्न निर्णय समेत गरेको थियो । तर गाउँपालिका अध्यक्षले पालिकाको काम नरोकिने भन्दै काम लगाउँदै आउनुभएको छ ।

दुुइवर्षको बिचमा ८ जना प्रमुख प्रशासकीय अधिकृत परिवर्तन भइसकेको सिद्धलेकमा सवारी साधन खरिद गर्दा देखिका विभिन्न चरणमा भएका योजना सम्झौता तथा विधि विपरीतका काम नगर्न पटक पटक भएका बैठकलाई समेत अटेर गरी अन्य दलका कार्यकर्ता र जनप्रतिनिधिहरूलाई धम्की दिने गरेकोले पालिकाको अनियमितता समाधान नभएसम्म गाउँसभा हुन नदिने नेकपा माओवादी केन्द्र सिद्धलेकका अध्यक्ष पुष्पराज थपलियाले बताउनुभयो ।

अध्यक्षको प्रवृत्ति श्रोत साधनको दुरुपयोग गर्ने, आफू पक्षका कर्मचारीलाई मात्र सेवा सुविधा दिने, गाउँपालिका उपाध्यक्षले अनुगमनमा लिएर हिँडेको सवारी साधन समेत फिर्ता लिने,आफूलाई मन पराउने दुइ वडाअध्यक्ष बाहेकको काम नगर्ने लगायतका दादागिरी बन्द गर्न र पालिकामा जनताको विकासको आशालाई साथ दिँदै दलहरु र आफू निकटका जनप्रतिनिधि आन्दोलमा उत्रिएर पारदर्शि हिसाब नभएसम्म गाउँ सभा हुन नसक्ने नेकपा एस सिद्धलेकका अध्यक्ष ईश्वरी अर्यालले बताउनुभयो ।

नेकपा एमाले, नेकपा एस, नेकपा माओवादी केन्द्रले प्रेस विज्ञप्ती प्रकाशन गरी सर्वपक्षीय सहकार्यको वातावरण बनाउन आग्रह गर्दै आर्थिक रुपमा पारदर्शी हिसाब सार्वजनिक गर्न, पालिकाको खातामा जम्मा गर्नु पर्ने रकम जम्मा गर्न आग्रह गरिएको छ ।

१५ जनाको सिद्धलेक कार्यपालिकामा १२ कार्यपालिका सदस्य गाउँपालिका उपाध्यक्षको नेतृत्वमा आन्दोलनमा छ भने गाउँपालिका अध्यक्ष समेत ३ जना अध्यक्षको पक्षमा देखिएका छन् ।

अनियमितताको विषय उठेपछि गाउँपालिका अध्यक्षले हस्ताक्षर गरी जेठ २३ र २५ गते दुइओटा विज्ञप्ति प्रकाशन गरी गाउँपालिका जनप्रतिनिधिहरूलाई अध्यक्षलाई सघाउन आग्रह गरेका छन् भने नसघाएमा कानुनको सहयोग लिने उल्लेख समेत गर्नुभएको छ ।

गाउँपालिकाको काम सकेर घर फर्कने समयमा बुधवार साँझ गाउँपालिका उपाध्यक्ष सबिता अर्यालको कार्यकक्षमा पुगेर गाउँपालिका अध्यक्ष खतिवडा सहित केही कर्मचारी तत्काल मिल्न धम्की दिँदै अन्यथा कार्यालय आउन नदिने बताएर आफूलाई धम्की दिएको उपाध्यक्ष अर्यालले बताउनुभयो ।

आफूविरुद्ध समाचार आइरहेको विषयमा समेत गाउँपालिका अध्यक्षले आफूले केहीलाई पैसा दिएको समेत कर्मचारीहरु समक्ष बताएको र पत्रकार सीताराम अधिकारीको नाम नै लिएर उसले समाचार लेखिरहेकोले ठिक पार्ने धम्की समेत कर्मचारीहरु समक्ष बताएको जानकारी प्राप्त भएको छ ।

गाउँपालिका अध्यक्षको विपक्षीहरुलाई तह लगाउने र नीति नियम आफूले बोलेपछि हुन्छ भन्ने मनसायबाट प्रेरित भएका अध्यक्ष खतिवडाको शैली वडा अध्यक्षलाई समेत गाली गर्न थालेपछि र अनियमितताको विषय उठेपछी वडा नम्बर १ का वडा अध्यक्ष पेमा लामाले कार्यालयमा चाबी बुझाएर मोटरसाईकल फिर्ता गरिदिनुभएको छ ।

अन्य वडा अध्यक्षहरुले पनि मोटरसाइकल फिर्ता गर्ने तयारी गरेको बताएका छन् ।

कार्यपालिका सदस्यहरुले समेत पालिकामा भएको अनियमितताको छानविन गर्न माग गर्दै पालिकामा दहत्तरबहत्तर ठेक्का बाहेकको राजश्व पुरानो वर्षको र अहिलेको जम्मा गर्न माग गरेका छन् ।

वडाअध्यक्ष तथा कार्यपालिका सदस्यहरुले पालिकाको काम अपारदर्शी भएकोले हिसाब नदेखाएसम्म गाउँ सभा नै गर्न नदिने चेतावनी दिएका छन् ।

पालिका अध्यक्षले जनताको काम नगरेकोले १५ मध्ये ११ कार्यपालिका सदस्यको बैठक बसी जनताको पक्षमा काम गर्नका लागि दिगो विकासका योजना बारे समेत छलफल गरिएको वडा अध्यक्ष देव पुलामीले बताउनुभयो ।

यो समाचार आजको नेपाल समाचारपत्रमा पत्रकार सिताराम अधिकारीले लेख्नुभएको छ ।