नागढुंगा–नौबिसे सडकखण्ड राती पूर्ण रुपमा बन्द हुने

नागढुंगा–नौबिसे सडक खण्ड (त्रिभुवन राजपथ) बिहीबार राती पनि पूर्ण रुपमा बन्द हुने भएको छ ।

बुधबार जिल्ला प्रहरी कार्यालय धादिङले एक सूचना जारी गर्दै बुधबार र बिहीबार राति १० बजेदेखि बिहान ३ बजेसम्म उक्त क्षेत्रमा सवारी आवागमन पूर्ण रुपमा रोक लगाइने बताएको छ ।

गएराति १० बजेदेखि बन्द भएको सडकखण्ड बिहान ३ बजेपछि खुलेको छ ।

नौबिसे खोलाको पुलमा काम गर्न सहज बनाउनु साथै सडक प्रयोगकर्तालाई हुन सक्ने जोखिम तथा यातायात आवागमनमा समेत बाधा पर्न जाने देखिएकोले सम्भावित जोखिमलाई मध्यनजर गर्दै दुई दिन उक्त क्षेत्रमा राति १० बजेदेखि बिहान ३ बजेसम्म सवारी आवागमनलाई रोक लगाएको जिल्ला प्रहरी कार्यालय धादिङले जानकारी दिएको छ ।

साथै यस समयमा एम्बुलेन्स र सुरक्षा निकायले प्रयोग गर्ने सवारी साधनलाई भने रोक लगाइएको छैन ।