खनियाबास र गंगाजमुनाका ८९ जनालाई बचत तथा ऋण व्यवस्थापन तालिम प्रदान

फुलखर्क । धादिङको गंगाजमुना र खनियाबास गाउँपालिकाका विभिन्न स्थानमा गठित समुहका पदाधिकारीहरुको लागि बचत तथा ऋण व्यवस्थापन तालिम सञ्चालन गरिएको छ ।

प्रयास नेपाल धादिङले आड्रा नेपालको साझेदारी तथा खनियावास र गंगाजमुना गाउँपालिकाको समन्वयमा संचालनमा भएको उत्थानशील जिविकोपार्जन तथा खाद्य सुरक्षा सुढृढिकरण परियोजना कार्यक्रम अन्तरगत गठित समुहका पदाधिकारीहरुको दुई दिने बचत तथा ऋण व्यवस्थापन तालिम संचालन गरिएको हो ।

गंगाजमुना गाउँपालिका वडा नं ५ फुलखर्क,वडा नं ३ को गुम्दी,वडा नम्बर ७ को बुढाथुम र खनियावास गाउँपालिका वडा नं ४ चौकीमा शुक्रबार र शनिबार भएको तालिममा ८९ जना सहभागी भएको लक्ष्मी सुनारले जानकारी दिनुभयो ।

तालिममा समुहमा बचतको महत्व, बचत संकलन, आम्दानी र खर्च अभिलेख, ऋण लगानी, पासबुक, बचत तथा ऋण परिचालन सम्बन्धि निति,नियम, समुहका पदाधिकारीहरुको काम, कर्तव्य , अधिकार , घुम्ती कोष परिचालन र पुर्व सहकारी शिक्षा लगायतका बिषयमा सहजकर्ताहरु सन्तोष सत्याल,शिव बहादुर भण्डारी, नारायण सुवेदी र राजकुमार श्रेष्ठले सहजिकरण गर्नु भएको थियो ।

कार्यक्रममा प्रयास नेपाल धादिङ र आड्रा नेपालको संस्थागत चिनारी र परियोजनाको लक्ष्य, उद्धेश्य संचालन प्रक्रिया र मुख्य क्रियाकलापहरुको बारेमा प्रयास नेपाल धादिङका पशुस्वास्थ्य प्राविधिक रुपेश तामाङ,जेण्डर एसोसपयट शर्मिला गुरुङ,पदम खत्री, कविता सापकोटाले जानकारी गराउनु भएको थियोे ।

कृषकको क्षमता विकास, जलवायु कृषक पाठशाला,प्राविधिक ज्ञान, सिप हस्तान्तरण गरी कृषि तथा पशुपालनमा उत्पादन र उत्पादकत्व बृद्धिमा टेवा पुर्याउने उद्धेश्यले खनियावास र गंगाजमुना गाउँपालिकामा उत्थानशील जिविकोपार्जन तथा खाद्य सुरक्षा सुढृढिकरण परियोजना संचालन गरिएको प्रयास नेपाल धादिङका कार्यकारी निर्देशक दामोदर अर्यालले बताउनु भयो ।

खनियास गाउँपालिकामा ३२ र गंगाजमुना गाउँपालिका ४८ जना गरी ८० वटा कृषक समुहहरु मार्फत परियोजनाले कृषि तथा पशुपालन क्षेत्रमा कार्य गरिरहेको प्रयास नेपालका कृषि प्राविधिक प्रमोद तामाङले जानकारी दिनुभयो ।