धादिङबेशीमा बजार अनुगमन शुरु

धादिङ । जिल्ला अनुगमन समितिले धादिङबेशीमा बजार अनुगमन शुरु गरेको छ ।

सहायक प्रमुख जिल्ला अधिकारी युवराज अर्यालका अनुसार विगतका आर्थिक वर्षमा जस्तै चालु आर्थिक वर्ष २०८१/०८२ मा बजार अनुगमन कार्य शुरु गरिएको हो।

बजारमा भइरहेका गतिविधिहरूलाई निरीक्षण, विश्लेषण, र मूल्याङ्कन गर्ने उद्देश्यले बजार अनुगमन शुरु गरिएको सहायक प्रमुख जिल्ला अधिकारी अर्यालले बताउनुभयो।

बजार अनुगमनका क्रममा बुधबार नीलकण्ठ८ धादिङबेशीस्थित साँघुटार र वडा नं. ३ को पुछारबजारमा रहेका एग्रोभेट र फलफूल पसलको अनुगमन गरिएको उद्योग तथा बाणिज्य कार्यालय धादिङका उद्योग अधिकृत राजेन्द्र कोइरालाले जानकारी दिनुभयो ।

एग्रोभेटहरुको दर्ता नविकरण, विक्रिका लागि राखिएका विषादीहरुको व्यवस्थापन, मूल्यसुचि, म्याद गुज्रिएका सामाग्री र खरीद तथा विक्रि,बिलको अवस्थाका बारेमा अनुमन गरिएको कोइरालाले बताउनुभयो ।

अनुगमनको क्रममा मूल्य सूचि, म्याद गुज्रिएका सामाग्री, नविकरण लगायतमा देखिएका कैफियत सुधार गर्न सुझाव दिइएको बताउनुभयो ।

अनुगमनमा जनस्वास्थ्य कार्यालय, कृषि विकास कार्यालय, पशुसेवा कार्यालय, नीलकण्ठ नगरपालिकाका प्रतिनिधिहरुको सहभागी थिए ।