धादिङमा पहिरोमा पुरिएका २ जना र खोलाले बगाएकी बालिका अझै भेटिएनन्,खोजी जारी

धादिङ । धादिङको गजुरी गाउँपालिका वडा नम्बर २ गुम्बाडाडाँमा पहिरोमा पुरिएर बेपत्ता भएका २ जनाको खोजी कार्य जारी रहेको छ।

शुक्रबार नदीमा माछा मार्न जान लागेका बेनिघाट रोराङ गाउँपालिका वडा नम्बर ६ का ४० वर्षीय जनता चेपाङ र २० वर्षीय सन्तु चेपाङ पहिरोमा परेर बेपत्ता भएका थिए ।

उनिहरुको खोजी भइरहेको जिल्ला प्रहरी कार्यालय धादिङका सूचना अधिकारी प्रहरी निरीक्षक प्रल्हाद सिलवालले बागमती कलमलाई जानकारी दिनुभयो ।

बेपत्ता दुई जना शुक्रबार दिउँसो निरन्तरको वर्षाका कारण गुम्बाडाडाँमा रहेको ओडारमा बस्दा पहिरो खसेर पुरिएको प्रहरी निरीक्षक सिलवालले बताउनुभयो।

खोजीका लागि नेपाल प्रहरी, सशस्त्र प्रहरी, नेपाली सेना र स्थानीयबासी परिचालित रहेको प्रहरी निरीक्षक सिलवालले बताउनुभयो।

यसैगरि गजुरी गाउँपालिका वडा नम्बर ७ र ८ को बिचमा पर्ने घट्टेखोलाले बगाएर बेपत्ता भएकी बालिकाको पनि खोजी कार्य जारी रहेको प्रहरी निरीक्षक सिलवालले बताउनुभयो।

बेपत्ता बालिका गजुरी गाउँपालिका ८ कि ६ वर्षीया युना तामाङ हुन्।

शुक्रबार दिउँसो पानी परिरहेकोले एकजना स्थानियले मोटरसाईकलमा घरतिर लाँदै गर्दा खोलाले बगाएको स्थानिय योगेन्द्र बस्नेतले जानकारी दिनुभयो ।

गाउँमा भाडामा घर लगिदिने क्रममा तिन जनालाई बगाएकोमा बालिकाको आमा र मोटरसाईकल चालक भने खोलाबाट निस्केका थिए ।