धादिङ खत्रीपौवाको पहिरोमा पुरिएको बसबाट दुई जनाको शव निकालियो

धादिङ । त्रिभुवन राजपथ अन्तरगत खत्रीपौवामा पहिरोले पुरिएको बसबाट दुई जनाको शव निकालिएको छ ।

धादिङ र काठमाडौको सिमाक्षेत्रमा पर्ने खत्रीपौवामा शनिबार विहान पहिरोले पुरिएको बसबाट दुई वटा शव निकालिएको उद्दारमा संलग्न युवा संघ नेपाल धादिङका अध्यक्ष सुनिल तामाङले जानकारी दिनुभयो ।

पहिरोमा पुरिएको तीन वटा सवारी मध्ये बुटवलबाट काठमाडौ आउदै गरेको बसबाट एक महिला र एक पुरुषको शव निकालिएको तामाङले बताउनुभयो ।

पहिरो झरेको क्षेत्रमा मोबाइलको नेटवर्कमा पनि समस्या आएको र दिनभर उद्दारमा खटिएका सुरक्षाकर्मीहरुको पनि मोबाइलमा सम्पर्क हुन सकेको छैन ।

बसमा चालकसहित १२ जना रहेको बुझिएको जिल्ला प्रहरी कार्यालय धादिङका प्रहरी निरीक्षक एवं प्रवक्ता प्रल्हाद सिलवालले बताउनुभयो ।

गाडीका धनीसंगको कुराकानीमा बुटवलबाट १२ जना र नारायणगढबाट एक जना यात्रु चढेका थिए ।

उनीहरु कोहिपनि सम्पर्कमा नभएको बसधनीलाई उदृत गर्दै प्रहरी निरीक्षक सिलवालले बताउनुभएको छ ।

अहिले ६ वटा डोजरले पहिरो पन्छाउने काम गरिरहेको छ ।

बिहिबारदेखीको निरन्तरको वर्षा, पहिरो र लेदो माटोले क्षतविक्षत भएको देशको मुख्य राजमार्गहरुमा अहिले सवारी आवागमन ठप्प छ ।

पूर्व पश्चिमका जिल्लाहरुबाट राजधानी काठमाडौं प्रवेश गर्ने नौबिसे नागढुंगा सडक बिहिबार साँझदेखि अवरुद्ध छ।