अपडेट : खत्रीपौवाको पहिरोमा पुरिएका माइक्रो र बसबाट १४ जनाको शव निकालियो

काठमाडौं । त्रिभुवन राजपथ अन्तरगत खत्रीपौवामा पहिरोले पुरिएको माइक्रो र बसबाट १४ जनाको शव निकालिएको छ ।

धादिङ र काठमाडौको सिमाक्षेत्रमा पर्ने खत्रीपौवामा शनिबार बिहान पहिरो जाँदा बस र माइक्रोबसहरु पुरिएका थिए ।

त्यस क्रममा लु १ ज ४५७८ नम्बरको माइक्रोबसबाट ५ वटा शव निकालिएको जिल्ला प्रहरी परिसर काठमाडौंका प्रवक्ता एसपी नवराज अधिकारीले जानकारी दिनुभयो ।

त्यस्तै नम्बर नखुलेको अर्को बसबाट ९ जनाको शव निकालिएको अधिकारीले बताउनुभयो ।

ती बसहरु शनिबार साँझ एक्साभेटरको सहायताले निकालिएको थियो ।

पहिरोमा अरु बसहरु पनि पुरिएको आशंकामा खोजी गरिरहेको प्रहरीले जनाएको छ ।उक्त घटनाको थप विवरण आउन बाँकी रहेको छ।