बाढीपहिरो : ज्यान गुमाउनेको संख्या ११२ पुग्यो,६८ जना बेपत्ता

अहिलेसम्म देशभर बाढी, पहिरो र डुबानबाट १ सय १२ जनाको मृत्यु भएको छ।

बिहिबारदेखीको भारी वर्षापछि आएको बाढी, पहिरो र डुबानबाट हालसम्म ६८ जना बेपत्ता भएका छन् भने एक सय जना घाइते भएका छन्।काठमाडौँ उपत्यकामा मात्रै ४८ जनाको मृत्यु भएको छ ।

काठमाडौँमा २५, भक्तपुरमा पाँच र ललितपुरमा १८ जनाको मृत्यु भएको गृह मन्त्रालयका सहसचिव एवं प्रवक्ता ऋषिराम तिवारीले बताउनुभयो ।

जल तथा मौसम विज्ञान विभागका अनुसार सरकारले वर्षासम्बन्धी अभिलेख राख्न थालेको ५४ वर्षयताकै सबैभन्दा बढी वर्षा उपत्यकामा शनिबार भएको छ।

शनिबार रातिसम्म मकवानपुर, सिन्धुली र काभ्रेपलाञ्चोकमा गरी ६८ जनाको नेपाली सेनाको हेलिकप्टरबाट उद्धार गरिएको प्रवक्ता ऋषिराम तिवारीले जानकारी दिनुभयो ।