धादिङ झ्याप्लेखोलाको पहिरोबाट निकालिएको १४ शव परिक्षणका लागि शिक्षण अस्पताल लगियो

धादिङ । धादिङको धुनिबेसी नगरपालिका–९ झ्याप्लेखोलाको पहिरोमा पुरिएका सवारीबाट निकालिएको १४ जनाको शव परीक्षणका लागि शिक्षण अस्पताल महाराजगंज लगिएको छ ।

पहिरोमा पुरिएको सवारी मध्ये बुटवलबाट काठमाडौ आउदै गरेको लु १ ज ४५७८ नम्बरको माइक्रोबसबाट पाँच जना महिला, अन्दाजी १८ महिनाको एक बालक र आठ जना पुरुषको शव निकालिएको उद्दारमा खटिनुभएका धुनिवेसी नगरपालिका–९ का वडा अध्यक्ष माधव सिलवालले जानकारी दिनुभयो ।

उहाँका अनुसार सबै शव माइक्रोबसबाट नै निकालिएको हो ।

पहिरोमा दुई वटा बस अगाडि र भित्तापट्टीको भाग पुरिएको अवस्थामा रहेको तर बसभित्र यात्रु नभेटिएको वडा अध्यक्ष सिलवालले बताउनुभयो ।

माइक्रोबस धनीसंगको कुराकानीका अनुसार मृत्यु हुनेमा बुटवलबाट १२ जना र नारायणगढबाट चढेका एक जना गरि १३ जना यात्रु र एक जना चालक हुन् ।

तर, पहिरोमा डुबिरहेको बसको चालक पनि सम्पर्कमा नरहेको कारण सबै शव माइक्रोबसकै यात्रुको भएको यकिन गर्न नसकिएको जिल्ला प्रहरी कार्यालय धादिङका प्रहरी उपरीक्षक गौतम केसीले बताउनुभयो ।

काठमाडौं र धादिङको सिमानामा पर्ने झ्याप्लेखोलामा शनिबार बिहान करिब २ बजेको आसपासमा ठूलो पहिरो खसेको स्थानीयको भनाई छ ।

त्यतिबेला नै माइक्रोबस (विंगर भ्यान) पहिरोमा पुरिएको हुनसक्ने अनुमान गरिएको छ ।

माइक्रोलाई गएराती पहिरोबाट बाहिर निकालिएपनि पहिरोमा फसेका अन्य दुई वटा बसको उद्धार भने केहिबेरमा थालिने जिल्ला प्रहरी कार्यालय धादिङका प्रहरी निरीक्षक एवं सुचना अधिकारी प्रल्हाद सिलवालले जानकारी दिनुभयो।

¥याकर र डोजरको सहायतामा उद्दार सुरु गरिने सिलवालले बताउनुभयो ।

निरन्तरको वर्षा, पहिरो र लेदो माटोले क्षतविक्षत पृथ्वी राजमार्गको नौबिसे मुग्लिन बिहिबार साँझदेखि अवरुद्ध रहेको छ ।