धादिङमा ‘गुरुङ ड्रेस फोटो कन्टेस्ट’ हुँदै,पुरस्कार राशि कति ? (प्रतियोगीताको नियमसहित)

धादिङ । धादिङमा ‘गुरुङ ड्रेस फोटो कन्टेस्ट’ हुने भएको छ ।

नेपाल तमु (गुरुङ) विद्यार्थी छोंज धीं जिल्ला कार्य समिति धादिङले गुरुङ जातीको पोषाकको संरक्षण, सवंद्र्धन र पुस्तान्तरण गर्ने उद्देश्यले ‘गुरुङ ड्रेस फोटो कन्टेस्ट–२०८१’ आयोजना गरिएको गुरुङ विद्यार्थी छोंज धीं धादिङका अध्यक्ष रेखबहादुर गुरुङले बताउनुभयो।

‘कला संस्कृति भेषभुषा गुरुङ जातीको पहिचान, यसको संरक्षण र संर्वद्धन हाम्रो अभियान’ भन्ने नारा सहित आयोजना गरिएको यस प्रतियोगीतामा सहभागी हुन ईच्छुक व्यक्तीहरुले गुरुङ ड्रेस लगाएको स्पष्ट बुझिने ओर्जिनल फोटो हुनुपर्ने, जुनसुकै उमेरका जुनसुकै समुदायका व्यक्तीले सहभागीता जनाउन सकिने अध्यक्ष गुरुङले बागमती कलमलाई बताउनुभयो ।

प्रतियोगीतामा प्रथम, द्धितिय र तृतिय हुनेले क्रमश नगद २० हजार, १० हजार र ५ हजारका साथै आकर्षक पुरस्कार प्राप्त गर्नेछन् भने उत्कृष्ठ १० प्रतियोगीहरुले गुरुङ ड्रेसको साथमा आकर्षक पुरस्कार प्राप्त गर्ने अध्यक्ष गुरुङको भनाई छ ।

साथै विजयी हुने ३ जनालाई गोरखाको बारपाक घुम्ने अवसर पनि रहेको आयोजकले जनाएको छ ।

सामाजिक सञ्जाल फेसबुकमा सञ्चालन हुने प्रतियोगीतामा सहभागी प्रतियोगी फोटोहरुमा प्राप्त लाइक/शेयर र बान्कि पूरा भए/नभएको आधारमा विजेता घोषणा गरिने आयोजकले जनाएको छ ।

सामाजिक सञ्जाललाई सहि सदुपयोग गर्दै सामाजिक सञ्जालकै माध्यमबाट सहभागीता जनाउन पाईने यस प्रतियोगीतामा जुनसुकै उमेरका र जुनसुकै समुदायका ईच्छुक व्यक्तीहरुले सहभागीता जनाउन सक्ने जनाएको छ ।

यो कन्टेस्ट गुरुङहरुको महान चाड ल्होसारको अवसरमा आगामी पौषको १५ गते सदरमुकाम धादिङबेसी स्थित खुला मञ्चमा एक विशेष समारोहका बिच विजेता घोषणा गरिने अध्यक्ष रेख बहादुर गुरुङले बताउनुभयो ।

वि.स.२०५६ सालमा स्थापना भएको नेपाल तमू (गुरुङ) विद्यार्थी छोज धीं धादिङले आफ्नो समुदायको भाषा, संस्कार, संस्कृति संरक्षण, संवद्र्धन र गुरुङ विद्यार्थीहरुको अधिकार प्राप्तिको लागि विभिन्न किसिमका रचनात्मक कार्यक्रमहरु गर्दै आएको छ ।

प्रतियोगीताको नियमहरु
– गुरुङ ड्रेस लगाएको स्पष्ट बुझिने ओर्जिनल फोटो हुनुपर्नेछ ।

– फोटो कन्टेस्टमा सहभागी हुन तोकिएको प्रवेश शुल्क रु १००/-QR बाट भुक्तानी गरेको रिसिप (स्क्रिनसर्ट) वा Garima Bikas Bank,Dhading Branch NEPAL TAMU (GURUNG) BIDHYARTHI CHHOJ DHI A/c N0.08110101207197000001 डिपोजिट गरेको भौचर फोटो सँगै पठाउनु पर्नेछ ।

– फोटोलाई Boost गर्न पाईने छैन । Boost गरिएका लाईक,कमेन्ट र शेयरलाई मान्यता दिईने छैन ।

– विश्वका जुनसुकै उमेरका जुनसुकै समुदायका व्यक्तीले सहभागीता जनाउन सकिनेछ ।

– सहभागीहरुले नेपाल तमू (गुरुङ) विद्यार्थी छोंज धीं जिल्ला कार्य समिति धादिङको आधिकारिक फेसबुक पेज वा Whatsapp N0.९८६१८२३४२६, ९८५१२१३२०९, ९८६५६३८७८८ मा फोटो पठाउन सकिनेछ ।

– प्रतियोगी फोटोहरुमा प्राप्त लाइक/शेयर र बान्कि पूरा भए/नभएको आधारमा विजेता घोषणा गरिनेछ ।

• गुरुङ पोषाक र पहिरन सम्बन्धी छोटो जानकारी

गुरुङ जातिका मानिसहरूको भेषभूषा आफ्नै किसिमका हुन्छन्। खास गरेर बाह्य प्रभावमा नपरिसकेका गुरुङहरू साधारण किसिमको खस्रो कपडाको लुगा लगाउँछन् ।

गुरुङ जातिका पुरुषहरू शरीरको माथिल्लो भागमा भोटो लगाई जाङमा कछाड र त्यसको भित्र लगौंटी बाँधेका हुन्छन्। तन्नेरीहरूले कछाडको माथि कम्मरमा कम्मर पेटी र शिरमा टोपी लगाउँछन्।

केहीले भोटो माथि कालो रङको कपडाको इष्टकोट लगाउँछन्।

हिउँदमा उच्च डाँडाहरूमा धेरै जाडो हुने हुँदा बाक्लो ऊनको बक्खु ओड्छन्। वर्षा ऋतुको पानीमा पनि सोही बक्खु ओड्छन्।

व्यापार तथा अन्य कारणको लागि भ्रमण गर्दा पनि गुरुङ पुरुषहरू बक्खुलाई ओड्ने तथा ओछ्याउने काममा पनि प्रयोग गर्दछन्। बक्खु नलगाउँदा भोटोमाथि ऐँठे (भाङ्ग्रा) भनिने कपडाले बेरेका हुन्छन्।

गुरुङ महिलाहरू शरीरको माथिल्लो भागमा चोलो र तल्लो भागमा गुन्यू भनिने छोटो फरिया लगाउँछन्। फरिया पटुकाले टम्म कस्सिएको हुन्छ र पछिल्तिर कम्मर मुनि मखमल (कालो) को तीन कुने कपडा लगाउने गर्छन्, यसलाई ताम्लो (टीकी) भनिन्छ र माथि घरबुनाको घलेक (स्यामा) लाउने गर्छन्।

यो अलि प्रौढ महिलाहरूमा मात्र सीमित हुन गएको छ । युवतीहरू बढी मात्रमा रङ्गीन कपडाहरू प्रयोग गर्दछन्।

गुरुङ युवतीहरू नाकमा झुम्केबुलाकी, बाला, शिरफुल, ढुङ्ग्री, लेस, पोते आदि लगाउँछन्।

धेरै जसो सम्पन्न परिवारका महिलाहरू नाडीमा सुनको बाला र चुरी विभिन्न रङका काँचका चुराहरू, गलामा सुनको हार इत्यादि र कानमा माडवाली (बाघमुखे बुट्टा काटिएको मुन्द्री) पनि लगाउँछन्। विधवा स्त्रीले काँचको चुरी पोते लगाउँदैनन ।