प्रेरणाको स्रोत बन्दै धादिङकी बाल विकास सहजकर्ता सरस्वती चेपाङ,हेरौँ उहाँको यात्रा

धादिङ । बेनिघाट रोराङ गाउँपालिका वडा नं ८ मा रहेको जनप्रभात आधारभूत विद्यालय जहाँ मुख्य रूपमा चेपाङ, गुरुङ, र नेवार समुदायका मानिसहरूको बसोबास छ ।

शिक्षाको अवस्था निकै कमजोर थियो। बाल विकास कक्षा र कक्षा १ एउटै कोठामा राखेर शिक्षण गरिन्थ्यो, बालबालिकालाई बालमैत्री व्यवहार पनि गरिंदैनथ्यो, र अभिभावकमा शिक्षाप्रति खासै चासो थिएन।

यस्तै परिस्थितिमा, बाल विकास सहजकर्ताका रूपमा चार वर्ष बिताएकी सरस्वती चेपाङको यात्रा एक चुनौतीपूर्ण तर प्रेरणादायी कथा हो।

चार वर्षपछि, एउटा गैरसरकारी संस्थाले जनप्रभातसहित अन्य विद्यालयहरूमा शिक्षामा पहुँच सुनिश्चितता कार्यक्रम सञ्चालन गर्यो, जसले सरस्वतीलाई बाल विकाससम्बन्धी तालिम र अवलोकन भ्रमणको अवसर दियो।

सात दिने तालिमपछि सरस्वतीले बाल विकासको महत्व र शिक्षण विधिबारे गहिरो ज्ञान प्राप्त गरिन्। यो ज्ञानले उनलाई विद्यालयमा ठुला परिवर्तन गर्न प्रेरित गर्यो।

तालिमपछि उनले पहिलो कदमका रूपमा बाल विकास र कक्षा १ लाई छुट्टाछुट्टै कक्षामा चलाउन सफल भइन्।

दोस्रो कदममा, उनले अभिभावकहरूसँग नियमित बैठक आयोजना गर्दै बाल विकासमा अभिभावकहरूको जिम्मेवारी र योगदानबारे जानकारी गराउन थालिन्।

यसले अभिभावकहरूमा चेतना वृद्धि गरायो, जसका कारण अभिभावकहरूले आफ्ना बालबालिकाको पोषण, माया ममता, र शिक्षामा थप ध्यान दिन थाले।

अभिभावकहरू आफ्नै सिप अनुसार स्थानीय स्तरमा पाइने कच्चा पदार्थबाट शिक्षण सामग्री बनाउन थाले। चकटी, हलो, गुन्द्री, जुवा, मोहोला, दाबिले, डोको, फुर्लुङ, खुर्पेटो जस्ता सामग्रीहरू विद्यालयमा उपलब्ध गराए, जसले बालबालिकाको सिकाइ प्रक्रियामा महत्त्वपूर्ण योगदान पुर्यायो।

मासिक बैठकले अभिभावक र विद्यालयबीचको सम्बन्धलाई अझ सुमधुर बनायो, जसले गर्दा अभिभावकहरू विद्यालयसँग अझ नजिकिए।

सरस्वतीले बाल विकासका निर्देशिकाहरूको पालना गर्दै दैनिक क्रियाकलापहरू सञ्चालन गरिन् र बालबालिकाको फोटोलियो निर्माण गरिन्।

बालबालिकाको प्रगति अभिभावकहरूलाई देखाउन उनीहरूले गरेका दैनिक क्रियाकलापहरू फाइलमा संग्रह गर्न थालिन्। परिणामस्वरूप, विद्यालय जान नमान्ने बालबालिकाहरू पनि खुशी हुँदै नियमित रूपमा विद्यालय आउन थाले।

अहिले विद्यालयको वातावरण बालमैत्री भएको छ, अभिभावकहरूको चेतना वृद्धि भएको छ, र साना साना बालबालिकाहरू सिक्न उत्सुक भएका छन्। अभिभावकहरू विद्यालयमा सामग्री लिएर आउँछन् र कक्षाको अवलोकन गर्न खुशीसाथ सहभागी हुन्छन्।

मैले बाल विकाससम्बन्धी तालिमबाट धेरै कुरा सिकें। अहिले मेरो व्यवहार बालमैत्री भएको छ र मैले स्थानिय स्तरमा पाइने खेर गएका सामग्रीबाट शिक्षण सामग्री बनाउन सुरु गरेको सरस्वती चेपाङ बताउछिन् ।

उनको सफलताको मुख्य कारण भनेको शिक्षामा पहुँच सुनिश्चितता कार्यक्रम र तालिम हो, जसले उनको सिप र क्षमतामा सुधार ल्यायो। यस अवसरका लागि उनले बिद्यालय, प्रयास नेपाल धादिङ, चाईल्ड फण्ड जापान, र बेनिघाट रोराङ गाउँपालिकालाई विशेष धन्यवाद दिएकी छिन्।

यो कथा जनप्रभात आधारभूत विद्यालयको मात्र नभई, बेनिघाट रोराङका धेरै समुदायहरूका लागि प्रेरणाको स्रोत बनेको छ।