धादिङमा झण्डै ६ सय जनामा डेङ्गी सङ्क्रमण पुष्टि

धादिङ । धादिङमा झण्डै ६ सय जनामा डेङ्गी सङ्क्रमण पुष्टि भएको छ ।

पछिल्लो २४ घण्टामा थप ५ जनामा संक्रमण पुष्टि भएको जनस्वास्थ्य कार्यालय धादिङले जनाएको छ ।

संक्रमित २ पुरुष र ३ महिला रहेकोे विवरणमा उल्लेख गरिएको छ।

यो सँगै जिल्लामा चालु आर्थिक बर्ष २०८१/८२ को साउनयता हालसम्म ५९७ जना संक्रमित भएका छन् । जसमा ३ सय २० पुरुष र २७७ महिला छन् ।

विवरण अनुसार सबैभन्दा बढि संक्रमित बेनिघाट रोराङ गाउँपालिकामा १९१, नीलकण्ठ नगरपालिकामा १०७, गल्छीमा ७२, गजुरीमा ५८, सिद्धलेकमा ३७, थाक्रेमा ३३, ज्वालामुखी १८, त्रिपुरासुन्दरीमा ७, गंगाजमुनामा ५, धुनिबेशीमा ४ र नेत्रावती डवजोङ,रुवीभ्याली र खनियाबास गाउँपालिकामा २/२ जनामा संक्रमण पुष्टि भएको छ ।

यस्तै बाहिरी जिल्लाका ५९ जनामा संक्रमण पुष्टि भएको विवरणमा उल्लेख गरिएको छ।

नेपालमा सङ्क्रमणबाट १२ जनाको मृत्यु भएको इपिडिमियोलोजी तथा सरुवा रोग नियन्त्रण महाशाखाले जनाएको छ ।

हाल हुम्ला जिल्ला बाहेक सबै जिल्लामा डेङ्गी सङ्क्रमण देखिएको छ।

अहिलेसम्म देशभर २८ हजार दुई सय भन्दा बढिमा सङ्क्रमण पुष्टि भएको छ। नेपालमा डेङ्गीका तीन प्रकारका भाइरस सक्रिय रहेको पाइएको छ ।

डेङ्गीका भाइरसका स्वरूप सेरोटाइप–१, सेरोटाइप–२, सेरोटाइप–३, सक्रिय रहेको इपिडिमियोलोजी तथा सरुवा रोग नियन्त्रण महाशाखाले जनाएको छ।