एनपीएलमा आज काठमाण्डु र कर्णाली खेल्दै

काठमाण्डौ । नेपाल प्रिमियर लिग (एनपीएल) मा आज काठमाण्डु गोर्खाज र कर्णाली याक्सले खेल्दैछन् । खेल कीर्तिपुरको त्रिवि क्रिकेट रङ्गशालामा दिउँसो साढे ३ बजे शुरु हुनेछ ।

काठमाण्डौ ५ खेलमा ३ जीत र २ हारसहित ६ अङ्क जोड्दै तालिकाको तेश्रो स्थानमा छ । कर्णाली ४ खेलमा १ जीत र तीन हारसहित २ अङ्कका साथ छैटौं स्थानमा छ । दुवै टोलीको प्ले अफमा पुग्ने सम्भावना कायमै छ ।

हिजो भएको खेलमा लगातार ५ वटा खेल जित्दै सुदूरपश्चिम रोयल्सले प्ले अफमा स्थान बनाएको छ । साविक विजेता जनकपुर बोल्ट्सलाई ६ विकेटले हराएर सुदूरपश्चिम यो सिजन प्ले अफमा पुग्ने पहिलो टोली बनेको छ । अहिलेसम्म एक खेल पनि जित्न नसकेको जनकपुर अङ्कतालिकाको पुछारमा छ ।

यस्तै हिजोको खेलमा लुम्बिनी लायन्सले पोखरा एभेञ्जर्सलाई २ विकेटले हरायो । लुम्बिनीको पनि प्ले अफमा पुग्ने सम्भावना कायमै छ । लुम्बिनी ५ खेलमा चार अङ्कसहित तालिकाको पाँचौ स्थानमा छ । अङ्कतालिकामा विराटनगर दोस्रो र चितवन चौथो र पोखरा सातौँ स्थानमा छ ।

एनपीएलमा आठ वटा फ्रेन्चाइज टोली सहभागी छन् । गएको मङ्सिर १ गतेदेखि शुरू भएको दोस्रो संस्करणको एनपीएल क्रिकेट यहि २७ गतेसम्म चल्नेछ ।