धादिङमा माघ २७ देखि एचपिभि खोप लगाइदै

धादिङ । धादिङमा २ हजार ७ सय ३३ जनालाई एचपिभि खोप लगाईने भएको छ ।

महिलाको पाठेघरको क्यान्सर विरुद्ध दिइने एचपिभि खोप अभियान यही माघ २७ देखि २९ गतेसम्म संचालन हुने छ ।

जिल्ला पूर्ण खोप समन्वय समितिको बैठकमा एचपिभि खोप सम्बन्धी विषयमा जानकारी दिँदै जनस्वास्थ्य कार्यालय धादिङका प्रमुख तथा जिल्ला पूर्ण खोप समन्वय समितिका सदस्यसचिव अर्जुन पौडेलले जिल्लाका २ हजार ७ सय ३३ जनालाई खोप दिइने बताउनुभयो ।

अभियान अन्तरगत विद्यालयमा अध्यायनरत कक्षा ६ का किशोरीहरु र विद्यालय बाहिर भएका १० वर्ष पुरा भएका ११ वर्षमुनिकालाई खोप लगाइने छ ।

धादिङ जिल्लामा यस अभियानका लागि तयारी भइरहेको उल्ल्ख गर्दै कार्यालय प्रमुख पौडेलले खोप सामाग्री जिल्लामा आएको र वितरण सुरु भएको छ ।

जिल्लामा २ सय ५६ खोप केन्द्रबाट १ सय ९८ स्वास्थ्यकर्मी र ४ सय २६ स्वयंसेवक मार्फत खोप दिइने छ ।

विद्यालय बाहिर रहेकाहरु समेत नछुटुन भनेर खोजि र पहिचान समेत गर्दै पाठेघरको मुखको क्यान्सरबाट बचाउने खोप लगाइने योजना रहेको जनस्वास्थ्य कार्यालयका खोप सुपरभाइजर पदमराज कैनीले जानकारी दिनुभयो ।

अभियानको समयमा खोप लगाउन कुनै कारणबस छुटेमा फागुनमा संचालन हुने नियमित खोप कार्यक्रममा किशोरीहरुलाई खोप दिइने छ ।