धादिङमा दुई बस एकापसमा ठोक्किँदा एक जनाको मृत्यु, दुई जना घाइते

धादिङ । पृथ्विलोकमार्ग अन्तर्गत धादिङको थाक्रे गाउँपालिका–६ दशकिलामा दुई वटा यात्रुवाहक बस एकापसमा ठोक्किँदा एक जनाको मृत्यु भएको छ भने दुई जना घाइते भएका छन्।

आज बिहान करिब ७ः३० बजेको समयमा दाङबाट काठमाण्डौ तर्फ आउँदै गरेको प्र.३–०१–००६ ख १५५२ नम्बरको बस र काठमाण्डौबाट रसुवा जाँदै गरेको बा.प्र.०१–००६ ख ५२०६ नम्बरको बस एकआपसमा ठोक्किएको हो।

दुर्घटनापछि दुवै बस नजिकै रहेको खाजा पसलमा ठोक्किन पुगेका थिए।

दुर्घटनाका क्रममा बाँकेको बैजनाथ गाउँपालिका–१ घर भई हाल सोही स्थानमा खाजा पसल सञ्चालन गर्दै आएका ५४ वर्षीय खगेश्वर शर्माको खाजा पसलमा क्षति पुगेको छ।

सोही पसल छेउमा टिप्पर रोकी चिया नास्ता गरिरहेका धुनिवेशी नगरपालिका-९ स्याउलेका ३५ वर्षीय टिप्पर चालक सुजन तामाङ गम्भीर घाइते भएका थिए।

टाउको तथा शरीरका विभिन्न भागमा गम्भीर चोट लागेका तामाङलाई उपचारका लागि काठमाण्डौस्थित राष्ट्रिय ट्रमा सेन्टर लगिएकोमा उपचारका क्रममा मृत्यु भएको हो ।

दुर्घटनामा खाजा पसल सञ्चालक खगेश्वर शर्मा घाइते भएका छन्। उनको अवस्था मध्यम रहेको र हाल ललितपुरस्थित B&B अस्पतालमा उपचार भइरहेको प्रहरीले जनाएको छ।

त्यसैगरी दुर्घटनामा रसुवा जाँदै गरेको बसमा सवार करिब ८ वर्षीया सफलता पुलामी मगर सामान्य घाइते भएकी छन्। उनको थाक्रे पोलिक्लिनिकमा उपचारपछि डिस्चार्ज गरिएको छ।

अन्य यात्रुहरू भने सकुशल रहेको जिल्ला प्रहरी कार्यलय धादिङका प्रहरी नायव उपरीक्षक तथा प्रवक्ता प्रकाश दाहालले जानकारी दिनुभयो।

हाल उक्त स्थानमा राजमार्ग अवरुद्ध नरहेको प्रहरीले जनाएको छ।

दुर्घटनामा परेका दुवै बसका चालकलाई इलाका प्रहरी कार्यालय खानीखोला धादिङको नियन्त्रणमा लिई थप अनुसन्धान गरिरहेको प्रहरी नायव उपरीक्षक दाहालले जानकारी दिनुभयो।