बैरेनीको आयाममा जिल्ला स्तरीय हिज्जे प्रतियोगिता,न्यु धादिङ बोर्डिङ स्कुल प्रथम

धादिङ । सिद्धलेक गाउँपालिका–१ नलाङ बैरेनीस्थित आयाम इङलिस स्कुलमा जिल्ला स्तरीय हिज्जे प्रतियोगिता सम्पन्न भएको छ ।

राष्ट्रिय निजि तथा आवासीय विद्यालय एसोसिएसन नेपाल (एन प्याव्सन) धादिङको आयोजना तथा आयाम इङलिस स्कुलको व्यवस्थापनमा (प्रि–प्राइमरी) जिल्ला स्तरीय हिज्जे प्रतियोगिता सम्पन्न भएको हो ।

प्रतियोगितामा जिल्लाका विभिन्न संस्थागत विद्यालयका विद्यार्थीहरूको उत्साहजनक सहभागिता रहेको थियो।

प्रतियोगितामा न्यु धादिङ बोर्डिङ स्कुल प्रथम, महाविर चुली बोर्डिङ स्कुल द्वितीय, धादिङ बोर्डिङ स्कुल तृतीय तथा आयोजक आयाम इङलिस स्कुलले सान्त्वना स्थान हासिल गर्न सफल भएका छन्।

एन प्याव्सन धादिङका अध्यक्ष प्रयास रेग्मीको अध्यक्षतामा भएको कार्यक्रममा उपाध्यक्ष अभिषेक बसौलाको प्रमुख आतिथ्यता रहेको थियो।

त्यस्तै, जिल्ला सदस्य विशाल श्रेष्ठ, आयाम इङलिस स्कुलका सञ्चालक विकास कोइराला तथा विद्यालयकी प्रिन्सिपल ममिता अर्याल लगायतको उपस्थिति रहेको थियो।

कार्यक्रममा एन प्याव्सनका उपाध्यक्ष बसौलाले आयाम इङलिस स्कुललाई धादिङ जिल्लाका आधारभूत तहका विद्यालयमध्ये एक नमुना बोर्डिङ स्कूलको रूपमा चित्रण गर्दै विद्यालयमा विद्यार्थीहरूको क्षमता अनुसार पठनपाठन हुने तथा अतिरिक्त क्रियाकलापमा पनि उत्कृष्ट प्रदर्शन भइरहेको उल्लेख गर्नुभयो।

कार्यक्रमका अध्यक्ष तथा एन प्याव्सन धादिङका अध्यक्ष प्रयास रेग्मीले विद्यालयका अध्यक्ष विकास कोइरालाको व्यवस्थापकीय दक्षता र नेतृत्व क्षमताको प्रशंसा गर्दै विद्यालयलाई अन्य बोर्डिङ सरह प्रतिस्पर्धी बनाएको बताउनुभयो।

उहाँले विद्यालयले धादिङबेसी, मलेखु र गजुरी क्षेत्रका विद्यालयहरूसँग आधारभूत तहसम्म प्रतिस्पर्धा गर्न सक्ने क्षमता विकास गरेको उल्लेख गर्नुभयो।

उहाँले विद्यालयका प्रिन्सिपल ममिता अर्यालको नेतृत्व र शिक्षक–शिक्षिकाको समर्पणका कारण विद्यालय सहज र सफल रूपमा अघि बढिरहेको धारणा राख्नुभयो ।

एन प्याव्सन धादिङका सदस्य विशाल श्रेष्ठले आयाम इङलिस स्कुलको ब्यबस्थापनलाई प्रशंसा गर्नुभयो ।

यसैगरी कार्यक्रम संयोजक तथा विद्यालयका सञ्चालक विकास कोइरालाले प्रतियोगिताले बालबालिकामा हिज्जे ज्ञान, आत्मविश्वास र प्रतिस्पर्धात्मक भावना अभिवृद्धि गर्ने विश्वास व्यक्त गर्नुभयो।