आयाम इङ्लिस स्कुलको १५ औँ अभिभावक दिवसमा अभिभावकबिच नृत्य प्रतियोगितादेखि फुड प्रदर्शनीसम्म

धादिङ । सिद्धलेक गाउँपालिका–१ नलाङ बैरेनीस्थित आयाम इङ्लिस स्कुलमा १५ औँ अभिभावक दिवस विविध कार्यक्रमका साथ सम्पन्न भएको छ ।

विद्यालयको वार्षिक कार्यतालिका अनुसार शुक्रबार आयोजित कार्यक्रममा अभिभावक नृत्य प्रतियोगिता, विद्यार्थीहरुको फुड प्रदर्शनी तथा वार्षिक पुरस्कार वितरण कार्यक्रम गरिएको हो ।

अभिभावक नृत्य प्रतियोगितामा भुमिका सिलवाल प्रथम, बिमला गुरुङ द्वितीय, ओस्कार घले र लक्ष्मी गुरुङ तृतीय तथा सुसिला भट्ट सान्त्वना भएका विद्यालयकी प्रधानाध्यापक ममिता अर्यालले जानकारी दिनुभयो ।

विजेताहरुलाई नगदसहित प्रमाणपत्र प्रदान गरिएको थियो । प्रतियोगितामा ११ जना अभिभावकको सहभागिता रहेको थियो ।

यस्तै, कार्यक्रमको अवसरमा लक्की ड्रमार्फत तीन जना विद्यार्थीलाई आगामी शैक्षिक वर्ष २०८३ का लागि शुल्क छुट प्रदान गरिएको छ ।

७५ प्रतिशत शुल्क छुट लक्ष्मी कार्की, ५० प्रतिशत छुट निर्मला घले र २५ प्रतिशत छुट सपना भट्टराईले प्राप्त गरेका छन् ।

कार्यक्रमका प्रमुख अतिथि परशुराम खतिवडाले विद्यालयले अभिभावक र विद्यार्थीबीचको सम्बन्धलाई अझ मजबुत बनाउन यस्ता कार्यक्रम आयोजना गर्नु अत्यन्तै सकारात्मक पक्ष रहेको बताउनुभयो ।

उहाँले शिक्षालाई व्यवहारिक र सिर्जनात्मक बनाउन स्थानीय तह सदैव सहकार्य गर्न तयार रहेको र सामुदायिक सहभागितामै गुणस्तरीय शिक्षाको आधार निर्माण हुने बताउनुभएको छ ।

यस्तै विद्यालय सञ्चालक समितिका अध्यक्ष विकास कोइरालाले विद्यालयको समग्र शैक्षिक उन्नयनका लागि अभिभावकको साथ र सहयोग अपरिहार्य रहेको बताउनुभयो ।

यस्ता कार्यक्रमले विद्यालय परिवारबीचको आत्मियता अझ बढाएको र आगामी दिनमा पनि यस्ता रचनात्मक कार्यक्रमलाई निरन्तरता दिइने बताउनुभयो ।

कार्यक्रममा अभिभावक, शिक्षक तथा विद्यार्थीहरुको उल्लेख्य उपस्थिति रहेको थियो ।