हावाहुरीले रुख ढलेर लाग्दा २ जनाको मृत्यु, ५ जना घाइते

काठमाण्डौ । हावाहुरीले रुख ढलेर लाग्दा उदयपुरको कटारीमा २ जनाको मृत्यु भएको छ भने ५ जना घाइते भएका छन् ।

हिजो बेलुकी ठूलो हावाहुरी चलेको बेला रुख ढलेर लाग्दा कटारी नगरपालिका–५ का ६४ वर्षीय वीरेन्द्र चौधरी र कटारी नगरपालिका-८ की मिनामाया तामाङको ज्यान गएको जिल्ला प्रहरी कार्यालय उदयपुरका डीएसपी निरञ्जन थापाले जानकारी दिनुभयो ।

कटारी–५ को राधाकृष्ण मन्दिर नजिक हावाले सुकेको सालको रुख ढल्दा चौधरीको ज्यान गएको हो । यो घटनामा रुखले लागेर ५ जना घाइते भएका छन् ।

घाइते सबैको प्रादेशिक अस्पताल कटारीमा उपचार भैरहेको छ । यस्तै कटारी नगरपालिका–८ की तामाङको घरमै हावाले भाँचेको रुखको हाँगाले लागेर ज्यान गएको उदयपुर प्रहरीले जनाएको छ ।

प्रि-मनसुनको योबेला दिउँसोपछि हावाहुरी तथा मेघगर्जन र चट्याङ पर्ने भएकाले चनाखो हुन मौसमविदको आग्रह छ ।