धादिङबेसी–मलेखु सडक सुचारु

धादिङ । पहिरो खसेर अवरुद्ध भएको धादिङबेसी–मलेखु सडकखण्ड पुनः सुचारु भएको छ।

कालुपाण्डे मार्ग अन्तर्गत सिद्धलेक गाउँपालिका–६ स्थित फिसफिसेटार नजिकै खसेको पहिरो पन्छाएसँगै सडक सञ्चालनमा आएको हो।

परेवाटार र गजुरीटार क्षेत्रका किसानले खेतबारीमा लैजाने सिँचाइ नहर थुनिँदा पानी सडकमा ओभरफ्लो भई पहिरो खसेको थियो, जसका कारण मलेखु–धादिङबेसी सडकखण्ड पूर्ण रूपमा अवरुद्ध भएको थियो।

राति करिब ३ बजेदेखि बन्द भएको सडक दुई वटा डोजर प्रयोग गरी निरन्तर पहिरो पन्छाएपछि भर्खरैदेखि सुचारु गरिएको प्रहरीले जनाएको छ।

हाल उक्त सडकखण्डमा यातायात सञ्चालन सामान्य बन्दै गएको छ भने बीच बाटोमा रोकिएका सवारी साधनहरू क्रमशः गन्तव्यतर्फ लागिरहेका छन्।