सिद्धलेकमा निजी जग्गा प्रयोगको विवादः मुआब्जा माग्दा अध्यक्षबाट दुर्व्यवहार (भिडियोसहित)

धादिङ । सिद्धलेक गाउँपालिकामा निजी जग्गा प्रयोगको विषयलाई लिएर विवाद उत्पन्न भएको छ । सिद्धलेक गाउँपालिका वडा नम्बर ४ का स्थानीयवासी कुल प्रसाद भट्टले आफ्नो नाममा रहेको करिब ४ आना जग्गा गाउँपालिकाले प्रयोग गर्दै आएको दाबी गर्नुभएको छ ।

भट्टका अनुसार उक्त जग्गामा गाउँपालिकाले गेट र शौचालय निर्माण गरी प्रयोग गरिरहेको छ । आफ्नो जग्गा फिर्ता गर्न वा कानुन अनुसार मुआब्जा उपलब्ध गराउन माग गर्दै उहाँ गाउँपालिका कार्यालय पुग्नुभएको थियो ।

उहाँको भनाइ अनुसार गाउँपालिका कार्यालयमा भएको भेटघाटका क्रममा गाउँपालिका अध्यक्षले पदीय मर्यादाको धज्जी उडाउँदै सेवाग्राहीमाथि अश्लील गालीगलौज र अभद्र व्यवहार गर्नुका साथै धम्कीपूर्ण अभिव्यक्ति दिएको आरोप लगाउनुभएको छ । “जग्गा फिर्ता वा मुआब्जाको विषयमा कुरा गर्न जाँदा असहज व्यवहार तथा अपमानजनक शब्द प्रयोग गरिएको हो ।” भट्टले भन्नुभयो ।

उक्त स्थान गाउँपालिकाको माथिल्लो क्षेत्रमा पर्ने र सोही स्थानमा संरचना निर्माण गरिएको उहाँले बताउनुभयो । उहाँका अनुसार उक्त जग्गा लामो समयदेखि सार्वजनिक प्रयोजनमा प्रयोग हुँदै आएको छ ।

यसअघिको स्थानिय सरकारलाई पनि पटक पटक कुरा राख्दा आश्वासन मात्रै दिदै ८ बर्ष कुराएको भन्दै कुल प्रसाद भट्टले यो सरकार बनिसकेपछी पनि मुआब्जा उपलब्ध गराउन या जग्गा फिर्ता गर्न माग गर्दा अश्लील गालीगलौज, अभद्र व्यवहार तथा धम्की दिने गरिएको बताउनुभयो ।

२०७४ श्रावण १८ गते गाउँपालीका कार्यलय भवन निर्माणको लागी ४ आना जग्गा राजी खुसिका साथ निशुल्क दान दिएको र २०७५ सालमा गाउँपालिकाले शौचालय निर्माणको लागी थप चार ४ आना बराबर जग्गा क्षतिपुर्ती दिन्छु भनी तत्कालीन गाउँपालिका अध्यक्ष प्रेमनाथ सिलवालले प्रतिबद्दता जनाएर जग्गा लिएको तर पटक पटक क्षतिपूर्ति को लागी निबेदन पेश गर्दा उहाँबाट सम्बोधन हुन नसकेको पीडीत भट्टको भनाई छ ।

अध्यक्ष खतिवडाले सार्वजनिक रूपमा व्यक्त गर्न समेत नमिल्ने तल्लो स्तरका शब्द प्रयोग गरी अपमानित गरेको भिडियो अहिले सामाजिक सञ्जालमा सार्वजनिक भएपछि अध्यक्ष खतिवडाको सर्वत्र विरोध भइरहेको छ।

अध्यक्ष खतिवडाले समस्या समाधान गर्नुको सट्टा उल्टै आक्रामक शैलीमा प्रस्तुत हुँदै अश्लील गालीगलौज गरेका छन् ।

भिडियोमा अध्यक्ष खतिवडाले सिद्धलेक गाउँपालिका वडा नम्बर ४ का स्थानीय बासिन्दा कुल प्रसाद भट्टसहित नेकपा सिद्धलेकको नेता तथा प्रदेश कमिटि सदस्य बुद्ध गुरुङ, नेकपा सिद्धलेकका सचिव बासु सिलवाल, सिद्धलेककै नेकपा नेता जनबर्गिय संगठन, मगर राष्ट्रिय मुक्ती मोर्चा नेपालका केन्द्रीय सचिव तथा बगमति प्रदेश कमिटी सदस्य केशब पुलामी मगरको टोलिलाई “अब उप्रान्त गाउँपालिका नआउन” भन्दै अपशव्द र कडा धम्की समेत दिएको सुनिन्छ ।

उक्त भिडियोमा दुबै पक्षबाट भनाभन भएको सुनिन्छ ।

यसअघि पनि विभिन्न विषयमा विवादमा तानिएका अध्यक्षले जग्गा पीडितलाई साथ दिने व्यक्तिहरूलाई ‘गुण्डा’ भन्दै प्रहरीमा उजुरी दिएको नेकपा सिद्धलेक जनवर्गिय संगठनका केशब पुलामी मगरले बताउनुभयो ।

अध्यक्ष खतिवडाको यस्तो अमर्यादित हर्कतका विरुद्धमा सिद्धलेकका प्रमुख राजनीतिक दलहरू नेपाली काँग्रेस र नेकपा एमाले मौन बस्नुले जनतामा थप निराशा छाएको छ।

नागरिकको मानमर्दन हुँदा र पदीय गरिमाको अपमान हुँदा समेत दलहरूले कुनै आधिकारिक धारणा सार्वजनिक नगर्नुलाई अर्थपूर्ण रूपमा हेरिएको छ।

यद्यपि, यस विषयमा गाउँपालिका अध्यक्षको धारणा लिन प्रयास गरिए पनि उहाँसँग सम्पर्क हुन सकेन् । गाउँपालिकाको आधिकारिक प्रतिक्रिया सार्वजनिक हुन भने बाँकी रहेको छ।

हेर्नुहोस् भिडियो……….
यस भिडियोमा अपशब्द बोलिएकोले ‘बिप साउन्ड’ प्रयोग गरिएको छ ।