एसईई आजदेखि : धादिङमा ५ हजार भन्दा बढी विद्यार्थी सहभागी

धादिङ- देशभर माध्यमिक शिक्षा परीक्षा (एसईई) आजदेखि शुरु हुँदैछ । यस वर्ष धादिङ जिल्लाबाट ५ हजार ४६ जना विद्यार्थी परिक्षामा सहभागि हुने भएका छन् ।

परिक्षाको तयारी पुरा गरी स्थानीय सुरक्षा निकाय समेत तयारी अवस्थामा रहेको शिक्षा विकास तथा समन्वय इकाइ धादिङका सूचना अधिकारी चन्द्रिका मल्लले जानकारी दिनुभयो ।

धादिङमा २४ परिक्षा केन्द्रबाट सहभागि विद्यार्थीहरुमध्ये पुरक तर्फ ८ सय जना र नियमित तर्फ ४ हजार २ सय ४६ जनाले एसइइ दिनेछन् । प्राविधिक तर्फ समेत धादिङमा १ सय ८२ जना विद्यार्थी सहभागि हुने जनाइएको छ ।

शिक्षा विकास तथा समन्वय इकाइका प्रमुख भूमिलाल शर्मा सुवेदीले एसइइ परिक्षा सफ पार्न, स्वच्छ, शान्त र मर्यादित बनाउन शिक्षक अभिभावक, विद्यार्थीहरुलाई आग्रह गर्दै केन्द्राध्यक्षहरुलाई परिक्षाको मर्यादा कायम गरि अझ राम्रो बनाउन आग्रह गर्नुभएको छ।

परिक्षाको लागी २४ केन्द्राध्यक्ष, ३५ सहायक केन्द्राध्यक्ष, नीरीक्षक २ सय ५३ जना तथा ३ सय ६० सुरक्षाकर्मी सहित ८ सय २५ जना जनशक्ति प्रत्यक्ष रुपमा परिचालित हुने तयारी भएको सूचना अधिकारी मल्लेले जानकारी दिनुभयो ।

परीक्षा नियन्त्रण कार्यालय कक्षा १० का अनुसार देशभर यस वर्ष ५ लाख १२ हजार ४२१ विद्यार्थी परीक्षामा सहभागी हुँदैछन् । ती परीक्षार्थीमध्ये २ लाख ५७ हजार ६१३ छात्रा, २ लाख ५४ हजार ८०१ छात्र र ७ जना अन्य छन्।

जापानको एभरेस्ट स्कुलसहित एक हजार ९६६ परीक्षा केन्द्रमा एसईई हुनेछ । नियमिततर्फ चार लाख ४१ हजार ५६६ जनाले र ग्रेड वृद्धितर्फ ७० हजार ८५५ जनाले परीक्षा दिन लागेका हुन् ।

परीक्षा सञ्चालनका लागि केन्द्राध्यक्ष, सहायक केन्द्राध्यक्ष, निरीक्षक, सहयोगी र सुरक्षाकर्मी गरी झण्डै ७३ हजार जनशक्ति परिचालन गरिएको छ ।

परीक्षा बिहान ८ बजेदेखि ११ बजेसम्म सञ्चालन हुनेछ । आज पहिलो दिन अनिवार्य अंग्रेजी विषयको परीक्षा हुँदैछ । परीक्षा आउँदो २९ गते सकिनेछ ।

यस वर्ष परीक्षालाई थप पारदर्शी र व्यवस्थित बनाइने भएको छ । उत्तरपुस्तिका परीक्षणलाई छिटोछरितो बनाई एक महिनाभित्रै नतिजा प्रकाशन गर्ने गृहकार्य भइरहेको छ ।

यस्तै, यस वर्ष एसईई परीक्षाको सामूहिक अनुगमनमा रोक लगाएको छ । अनुगमनका लागि हरेक जिल्लामा प्रमुख जिल्ला अधिकारीको संयोजकत्वमा समिति गठन गरिएको छ ।