धादिङबाट २८६ किलो भन्दा बढी गाँजा र अफिमसहित २ जना पक्राउ

धादिङ । पृथ्वी लोकमार्ग अन्तरगत धादिङको गजुरी गाउँपालिका-१ गजुरीबजारबाट लागूऔषध गाँजा र अफिमसहित २ जना पक्राउ परेका छन् ।

आइतबार लागूऔषध ओसार पसार भईरहेको भन्ने बिशेष सूचनाको आधारमा इलाका प्रहरी कार्यालय गजुरी धादिङबाट खटिएको प्रहरी टोलीले आदमघाटबाट गजुरी तर्फ आउदै गरेको बा ५ ख ७५३७ नं. को आईचर गाडीलाई चेकजाँच गर्ने क्रममा लागूऔषध फेला पारेको प्रहरीले जनाएको छ।

पक्राउ पर्नेमा आइचर गाडी चालक धादिङको नीलकण्ठ नगरपालिका वडा नं.८ बस्ने बर्ष २२ को अम्मर बि.क. र गाडीमा सवार धादिङ सिद्धलेक गाउँपालिका वडा नं.५ बस्ने बर्ष १९ को होम बहादुर बि.क. रहेको जिल्ला प्रहरी कार्यालय धादिङका सूचना अधिकारी प्रहरी नायव उपरीक्षक प्रकाश दाहालले जानकारी दिनुभयो ।

आइचरको पछाडी ढालामा त्रिपालले छोपेको अवस्थामा नौ वटा बोरा भित्र पहेलो प्लाष्टिकले बेरेर पोका पारी राखेको अवस्थामा लागू औषध फेला परेको प्रहरीले जनाएको छ।

पकाउ परेका व्यक्तिहरुको साथबाट बा ५ ख ७५३७ नं.आईचर गाडीसंगै २८६ किलो ४०० ग्राम गाँजा, २०० ग्राम लागू औषध अफिम र ४ थान मोवाइल बरामद गरिएको प्रहरी नायव उपरीक्षक दाहालले बताउनुभयो ।