धादिङमा इको भ्यान दुर्घटना हुँदा ७ यात्रु घाइते (घाईतेहरुको विवरणसहित)

धादिङ । नीलकण्ठ नगरपालिका–१० स्थित माथिल्लो टारिबेशीमा इको भ्यान दुर्घटना हुँदा ७ जना घाईते भएका छन् ।

त्रिपुरासुन्दरी गाउँपालिका अन्तर्गत रहेको नृसिंहधाम दर्शन गरी धादिङबेसी तर्फ आउँदै गरेको बागमती प्रदेश BAF ०२२३ नम्बरको मारुती इको भ्यान अनियन्त्रित भई सडकबाट खसेको प्रहरीले जनाएको छ।

दुर्घटनामा भक्तपुर सूर्यविनायक-५ निवासी ५४ वर्षीय श्यामकृष्ण धुख्वा, सूर्यविनायक–७ का ५३ वर्षीय नुच्छेबहादुर कोजु तथा ललितपुर महालक्ष्मी–७ का ५२ वर्षीय राजेन्द्र महर्जन गम्भीर घाइते भएका छन्।

उनीहरूलाई थप उपचारका लागि रिफर गरिएको धादिङ अस्पतालले जनाएको छ।

त्यसैगरी दुर्घटनामा भक्तपुर सूर्यविनायक–१ का ५८ वर्षीय राजेन्द्र कार्की, सूर्यविनायक–५ का ५५ वर्षीय पूर्णबहादुर वासु, सूर्यविनायक–४ का ७२ वर्षीय श्याम खड्का र सूर्यविनायक–५ का ५५ वर्षीय परशुराम कोइराला पनि दुर्घटनामा घाइते भएका छन्।

उनीहरूको अवस्था मध्यम रहेको बताइएको छ। घाइतेहरूको स्थानीयवासी तथा सुरक्षाकर्मीको सहयोगमा उद्धार गरी धादिङ अस्पताल ल्याइएको थियो।