धादिङका पत्रकार राजेन्द्रप्रताप शाहको शालिक अनावरण

धादिङ । नेपाल पत्रकार महासंघ धादिङका संस्थापक सचिव एवं पूर्व अध्यक्ष स्वर्गीय पत्रकार राजेन्द्रप्रताप शाहको शालिक अनावरण गरिएको छ ।

बुधबार एक कार्यक्रमका बिच धादिङ क्षेत्र नम्बर २ बाट निर्वाचित सांसद बोधनारायण श्रेष्ठले स्वर्गीय शाहको अर्धकद शालिक अनावरण गर्नुभएको हो ।

शालिक अनावरणपछि सांसद श्रेष्ठले पत्रकार शाहले समाजमा पुर्‍याउनुभएको योगदानबारे चर्चा गर्नुभएको थियो ।

वि.सं. २०१८ बैशाखमा धादिङको ज्वालामुखी गाउँपालिका-३, साविकको मैदीमा जन्मिनु भएका शाहको २०७८ चैत २ गते राती निधन भएको थियो ।

धादिङकै पहिलो फोटो पत्रकारको रुपमा चिनिने पत्रकार शाह पछिल्लो समय पिजन खबर डटकमको प्रवन्ध निर्देशकको रुपममा कार्यरत हुनुहुन्थ्यो ।

पत्रकार राजेन्द्रप्रताप शाहले गोरखापत्र, कान्तिपुर दैनिक, हिमालय टाइम्स लगाएतका विभिन्न छापामा काम गर्नुभएको थियो ।

महासंघ परिसरमा यसअघि महासंघका संस्थापक अध्यक्ष स्वर्गीय सिताराम प्रसाद वर्माको शालिक अनावरण गरिसकिएको थियो। वर्माकै शालिक भएको स्थानमा शाहको शालिक थप गरिएको हो ।

यस्तै सोही कार्यक्रमको अवसरमा नेपाल पत्रकार महासंघ जिल्ला शाखा धादिङले संस्थापक पदाधिकारी तथा सदस्यहरुलाई सम्मान गरेको छ ।

महासंघले आफ्नो २४औं साधारणसभाको अवसरमा संस्थापक उपसभापति बासु तिमल्सिना, कोषाध्यक्ष लक्ष्मी कट्टेल, सदस्यहरु मोहन कुमार श्रेष्ठ, नबिनबन्धु पहाडी र उत्तम कँडेललाई सम्मान गरेको हो ।

जिल्लामा व्यावसायिक पत्रकारिताको जग बसाल्न र श्रमजीवी पत्रकारहरूको हकहितका लागि सुरुवाती दिनमा संघर्ष गर्ने अग्रजहरूको योगदानलाई कदर गर्दै सम्मान गरिएको महासंघ धादिङका अध्यक्ष सीताराम अधिकारीले बताउनुभयो ।

यसैगरी कार्यक्रमको अवसरमा जिल्लामा क्रियाशिल पत्रकारहरुको निशुल्क स्वास्थ्य परिक्षण समेत गरिएको छ ।

आयुर्वेद तथा वैकल्पिक चिकित्सालय धादिङ र नेपाल पत्रकार महासंघ धादिङको सहकार्यमा जिल्लामा कार्यरत पत्रकारहरुको स्वास्थ्य परिक्षण गरिएको हो ।

महासंघकोे २४औं साधारणसभाको अवसरमा कार्यक्रम स्थलमै गई ब्लड सुगर, युरिक एसिड, लिभर फङ्सन टेस्ट, किड्नीको फङ्सन र हेमोग्लोविन परिक्षण गरिएको छ ।

उमेर अनुसार उचाई र तौल परिक्षण गरी आवश्यक सल्लाह दिइएको छ । चिकित्सालयले ठाउँठाउँमा पुगेर शिविर संचालन गर्ने, निशुल्क स्वास्थ्य परिक्षण गर्ने, आयुर्वेद चिकित्सालय र आयुर्वेदिक उपचारबारे सचेतना कार्यक्रम गर्दै आउको चिकित्सालय धादिङका प्रमुख डा.मनोज कुमार चौधरीले जानकारी दिनुभयो ।