नीलकण्ठद्वारा एसईई र BLE मा ४ जिपिए ल्याउने विद्यार्थीसँगै शतप्रतिशत नतिजा ल्याउने विद्यालय र शिक्षकलाई नगदसहित सम्मान

धादिङ । धादिङको नीलकण्ठ नगरपालिकाले माध्यमिक शिक्षा परिक्षा (एसईई) मा ४ जिपिए ल्याएर उत्कृष्ट नतिजा हासिल गर्ने विद्यार्थी तथा विद्यालयलहरुलाई सम्मान गरेको छ ।

शनिबार नगरपालिकाले एक समारोहका बीच विद्यार्थी तथा विद्यालयलाई सम्मान गरेको हो ।सम्मान अघि विद्यार्थी र शिक्षकहरुलाई बाजागाजासहित बजार परिक्रमा गराईएको थियो ।

नगर क्षेत्रका नीजि तथा सामुदायिक विद्यालयबाट एसईईमा ४ जिपिए ल्याएका पाँच जना विद्यार्थीहरुलाई जनही ५० हजार रुपैयाँ तथा शत प्रतिशत नतिजा ल्याउन सफल २ वटा विद्यालयलाई ४ लाख नगदसहित सम्मान गरेको हो ।

एसईईमा ४ जिपिए ल्याउने बिधार्थीहरुमा नीलकण्ठ बालमन्दिरका विपिसा सुवेदी, दिप्सन छत्कुली, प्रशंसा गुरुङ, नविना श्रेष्ठ तथा न्यू किबोकी रोजिना चौलागाईं रहेका छन् भने शत प्रतिशत बिद्यार्थी उत्तिर्ण गराउन सफल २ विद्यालयहरु भैरवी माध्यमिक विद्यालय सुनौलाबजार र शंखादेवी माध्यमिक विद्यालय ज्यामरुङ रहेका छन् ।

भैरवी माध्यामिक विद्यालयले यसअघि पनि शत प्रतिशत बिद्यार्थी उत्तिर्ण गराउन सफल भएको थियो ।

त्यसैगरी कक्षा ८ को आधारभूत तह परीक्षा BLE मा शतप्रतिशत विद्यार्थी उत्तीर्ण गराउने सात विद्यालयलाई नगद ५०र५० हजार रुपैयाँका दरले सम्मान गरिएको छ ।

सम्मानित हुने विद्यालयहरूमा शंखादेवी मा.वि, महेन्द्रोदय आधारभुत विद्यालय, महेन्द्र मा.वि, महेन्द्रोदय कालिका मा.वि, पाल्पा सामरीभञ्ज्याङ मा.वि,स्थानपती आ.वि, मनरुपी मा.वि, पञ्चकन्या मा.वि, धादिङ बोर्डिङ आ.मा.वि, न्यू किबो बोर्डिङ स्कुल, सुनगाभा एकेडेमी चिल्ड्रेनपार्क आ.मा.वि र न्यू धादिङ बोर्डिङ स्कुल रहेका छन् ।

कक्षा ८ को परीक्षामा ४ जीपीए प्राप्त गर्ने १२ जना विद्यार्थीलाई जनही १० हजार रुपैयाँसहित सम्मान गरिएको छ ।

सम्मानित हुने विद्यार्थीहरूमा नीलकण्ठ बालमन्दिरका आदर्श अधिकारी, आर्सन रिजाल, जिया अधिकारी, मनोज थापा, सम्राट श्रेष्ठ र सौरभ सिंखडा रहेका छन् ।

त्यस्तै चिल्ड्रेनपार्ककी अमिज्ञा गुरुङ, न्यू धादिङ बोर्डिङका मुहमद सरिफ मिया र दीक्षा रिजाल, सुनगाभाकी अनुजा तामाङ तथा न्यू किबोका अंकित लम्साल र जेनिक राना रहेका छन् ।

यसैगरी नगरपालिकाले एसईईमा शतप्रतिशत नतिजा दिलाउने १११ जना र कक्षा ८ को परीक्षामा शतप्रतिशत नतिजा दिलाउने १९६ जना विषयगत शिक्षक गरी ३०७ जना शिक्षकलाई समेत सम्मान गरेको छ ।

नीलकण्ठ नगरपालिकाका प्रमुख भीम प्रसाद ढुंगानाले नगरपालिका शिक्षा क्षेत्रमा लगानी गर्न पछि नपर्ने बताउनुभयो । यस उपलब्धिलाई शैक्षिक सुधारको संकेतका रूपमा लिँदै शत प्रतिशत नतिजा ल्याउने हो भने जति आवश्यक परेपनि बजेट विनियोजन गर्ने बताउनुभयो ।

यस्तै नीलकण्ठ नगरपालिकाका उप–प्रमुख दिपक विश्वकर्माले नगरपालिकाले विशेष योजना बनाएर काम गरिरहेको बताउनुभयो । निःशुल्क शिक्षादेखि शैक्षिक क्षेत्रमा योजना नै बनाएर काम गरिरहेको बताउनुभयो ।

यसैगरी नगरपालिकाका वरिष्ठ शिक्षा अधिकृत प्रकाश दत्त भट्टले उत्कृष्ट विद्यालय, शिक्षक र विद्यार्थीलाई प्रोत्साहन गर्दै गुणस्तरीय शिक्षाको वातावरण निर्माण गर्ने उद्देश्यले हरेक वर्ष यस्ता सम्मान कार्यक्रम सञ्चालन गर्दै आएको बताउनुभयो ।

नीलकण्ठ नगरपालिकाले गरेको सम्मानले भावी दिनहरुमा थप हौसला थपिएको शिक्षकहरुले बताएका छन् ।