उपभोक्ता अधिकार र बजार अनुगमनबारे अन्तरक्रिया

धादिङ । धादिङबेसीमा उपभोक्ता अधिकार र बजार अनुगमनबारे अन्तरक्रिया कार्यक्रम सम्पन्न भएको छ ।

राष्ट्रिय उपभोक्ता मञ्च धादिङ र उपभोक्ता हित संरक्षण मञ्च धादिङको समन्वयमा नीलकण्ठ नगरपालिकाले उपभोक्ता अधिकार तथा बजार व्यवस्थापनसम्बन्धी मंगलबार धादिङबेँसीमा अन्तरक्रिया कार्यक्रम आयोजना गरेको हो।

कार्यक्रममा उपभोक्ता अधिकार, उपभोक्ता संरक्षण ऐन, बजार अनुगमन, गुणस्तरहीन तथा म्याद नाघेका वस्तुबाट हुने असर, कालाबजारी, अनुचित मूल्यवृद्धि तथा कृत्रिम अभाव नियन्त्रणका विषयमा छलफल गरिएको थियो ।

कार्यक्रमका प्रमुख अतिथि नीलकण्ठ नगरपालिकाका नगर प्रमुख भीमप्रसाद ढुंगानाले उपभोक्ता सुरक्षाका लागि सरकारले नियमित रूपमा बजार अनुगमन गर्दै आएको र अनुगमनका क्रममा दोषी पाइए कानुनबमोजिम कारबाही गरिने बताउनुभयो ।

जिल्लामा बजार अनुगमन भइरहेको भए पनि त्यसको प्रभावकारिता अपेक्षाकृत कम देखिएको उल्लेख गर्दै उहाँले सेवा प्रदायक निकायहरू समयानुकूल जिम्मेवार बन्न नसकेकोतर्फ ध्यानाकर्षण गराउनुभयो । साथै, उपभोक्ता हित संरक्षणका लागि सरोकारवाला निकायहरूले विशेष चासो दिनुपर्नेमा जोड दिनुभयो ।

नगरपालिकाका उपप्रमुख दीपक विश्वकर्माले बजार व्यवस्थापनलाई प्रभावकारी बनाउँदै उपभोक्तामैत्री वातावरण सिर्जना गर्न सम्बन्धित निकायहरू अझ जिम्मेवार बन्नुपर्ने बताउनुभयो ।

यस्तै नगरपालिकाका प्रमुख प्रशासकीय अधिकृत हरिदत्त कंडेलले उपभोक्ता सुरक्षाको विषय दिनप्रतिदिन जटिल बन्दै गएको बताउँदै उपभोक्ताको अधिकार र सुरक्षाका लागि सबै निकाय एकजुट हुनुपर्ने धारणा राख्नुभयो ।

उहाँले स्वच्छ बजार निर्माण तथा उपभोक्ता सचेतना अभिवृद्धिका लागि स्थानीय तह तथा जिल्लास्थित कार्यालयहरूले विभिन्न कार्यक्रम सञ्चालन गरिरहेको जानकारी दिनुभयो ।

राष्ट्रिय उपभोक्ता मञ्च धादिङका अध्यक्ष प्रेमलाल महर्जनले उपभोक्ता अधिकार संरक्षण विभाग वा मन्त्रालयको एकल प्रयासले मात्र सम्भव नहुने भन्दै अन्तरमन्त्रालय, अन्तरविभाग तथा विभिन्न निकाय र संघसंस्थाबीच सहकार्य आवश्यक रहेको बताउनुभयो ।

उपभोक्ता अधिकारसम्बन्धी जनचेतना विस्तार गर्न सबै पक्षको सक्रिय सहभागिता आवश्यक रहेको उहाँको भनाइ थियो ।