धादिङ पौवामा खानेपानी आयोजनाका सब-इन्जिनियरमाथि कुटपिट, एक गम्भीर घाइते

धादिङ । धादिङको नीलकण्ठ नगरपालिका–४ धादिङ पौवामा संघीय खानेपानी तथा ढल व्यवस्थापन कार्यालय, चितवन अन्तर्गत धादिङ शाखा कार्यालयमा कार्यरत सब-इन्जिनियरमाथि कुटपिट भएको छ।

घटनामा एक जना सब-इन्जिनियर गम्भीर घाइते भएका छन्।

पीडित पक्षका अनुसार इजरा खानेपानी आयोजनाको साइट निरीक्षणका लागि धादिङ पौवा जाँदै गरेका प्राविधिकहरू मोटरसाइकलमा यात्रा गरिरहेका बेला बाटोमा ढलान गरिएको सडक खण्ड पार गरेपछि एक व्यक्तिले मोटरसाइकल रोकी उनीहरूमाथि आक्रमण गरेका थिए।

कुटपिटबाट सप्तरीको सप्तकोशी नगरपालिका-२ निवासी सब-इन्जिनियर हबेन्द्र कुमार यादव गम्भीर घाइते भएका छन्।

आक्रमणकारीले मुखमा मुक्का प्रहार गर्दा उहाँका दाँत हल्लिनुका साथै बङ्गारा नजिकको हड्डीसमेत भाँचिएको प्रारम्भिक परीक्षणबाट खुलेको पीडित पक्षले जनाएको छ।

धादिङ अस्पतालमा प्रारम्भिक उपचारपछि थप उपचारका लागि उहाँलाई काठमाडौंस्थित बी एन्ड बी अस्पताल, ग्वार्को रिफर गरिएको प्रहरीले जनाएको छ।

घटनामा मोटरसाइकल चालक चितवनको भरतपुर महानगरपालिका–९ निवासी सब-इन्जिनियर सुरेश आले मगरमाथि पनि आक्रमण भएको थियो।

हेल्मेट लगाएका कारण उहाँ सामान्य अवस्थामा रहेको बताइएको छ।

पीडित पक्षले नीलकण्ठ नगरपालिका–४ निवासी ४० वर्षीय सन्जिप मल्लले कुटपिट गरेको दाबी गरेको छ।

घटनाबारे जिल्ला प्रहरी कार्यालय धादिङमा निवेदन दर्ता भइसकेको र घटनाको अनुसन्धान तथा आरोपितको खोजी कार्य भइरहेको प्रहरीले जनाएको छ।