घर फोडेर सुन र नगद चोरी गर्ने धादिङका एक युवक पक्राउ

धादिङ । चोरी सम्बन्धी घटनामा यसअघि दुई पटक सजाय भुक्तान गरिसकेका एक युवक तेस्रो पटक पनि चोरी अभियोगमा पक्राउ परेका छन्।

पक्राउ पर्नेमा नीलकण्ठ नगरपालिका-११ सिम्ले ज्यामरुङ निवासी १९ वर्षीय याकुव नेपाली रहेको जिल्ला प्रहरी कार्यालय धादिङका निमित्त सूचना अधिकारी प्रहरी निरीक्षक श्यामकुमार बस्नेतले जानकारी दिनुभयो ।

प्रहरीका अनुसार याकुव यसअघि २०७८ चैत २१ गते बागलुङ नगरपालिका-९ तित्याङस्थित रामप्रसाद शर्माको घरबाट सुनका गरगहना चोरी गरेको अभियोगमा पक्राउ परेका थिए।

उक्त मुद्दामा बागलुङ जिल्ला अदालतले उनलाई दुई वर्ष बालसुधार गृहमा राख्ने तथा २३ हजार रुपैयाँ जरिवाना गर्ने फैसला गरेको थियो। उनले कास्कीको सराङकोटस्थित बालसुधार गृहमा सजाय भुक्तान गरेका थिए।

त्यसपछि २०८१ असोज १५ गते सिद्धलेक गाउँपालिका–५ स्याखुटार निवासी कल्पना घलेको घरबाट ६४ हजार ५८० रुपैयाँ चोरी गरेको आरोपमा पुनः पक्राउ परेका याकुवलाई धादिङ जिल्ला अदालतले दुई वर्ष कैद र २० हजार रुपैयाँ जरिवाना गर्ने फैसला गरेको थियो।

उनी भक्तपुरस्थित बालसुधार गृहमा सजाय भुक्तान गरिरहेका बेला २०८२ भदौ २५ गते जेन-जी आन्दोलनका क्रममा त्यहाँबाट फरार भएका थिए।

२०८३ जेठ २४ गते नेत्रावती डबजोङ गाउँपालिका–४ निवासी मिनबहादुर तामाङको घरमा ताला फुटाई चोरी भएको घटनापछि अनुसन्धानका क्रममा याकुवको संलग्नता खुलेको प्रहरीले जनाएको छ ।

उक्त घटनामा घरभित्र प्रवेश गरी एक तोला सुनको नौगेडी माला, ३५.३ लाल सुनको माइली तिलहरी तथा १० हजार रुपैयाँ नगद चोरी भएको थियो।

स्थानीयवासीले दिएको हुलिया तथा प्रहरीको सूक्ष्म अनुसन्धानका आधारमा याकुवलाई जेठ २५ गते पक्राउ गरिएको प्रहरीले जनाएको छ।

उनको घर तथा शरीर खानतलासी गर्दा चोरीमा संलग्न रहेको प्रमाणस्वरूप सुनका नौगेडीका टुक्रा, सुनका तीन थान औँठी, एक थान मोबाइल फोन तथा ४ हजार १ सय रुपैयाँ नगद बरामद गरिएको प्रहरीले जनाएको छ।

पक्राउ परेका याकुवविरुद्ध मुलुकी अपराध संहिता, २०७४ को दफा २४३ अन्तर्गत चोरी कसूरमा धादिङ जिल्ला अदालतबाट सात दिनको म्याद थप अनुमति लिई थप अनुसन्धान भइरहेको जिल्ला प्रहरी कार्यालय धादिङका निमित्त सूचना अधिकारी बस्नेतले जानकारी दिनुभयो ।