भरतपुर कारागारबाट फरार एक कैदी फुर्केखोलाबाट पक्राउ

धादिङ । जेनजी आन्दोलनका क्रममा चितवनको भरतपुर कारागारबाट फरार भएका एक कैदीलाई धादिङ प्रहरीले पक्राउ गरेको छ।

लागू औषध मुद्दामा तीन वर्ष कैद सजाय भुक्तान गरिरहेका चितवन जिल्लाको खैरहनी नगरपालिका–१३ घर भई हाल धादिङको बेनिघाट रोराङ गाउँपालिका-३ मलेखु बस्दै आएका २१ वर्षीय महेश सुनारलाई पक्राउ गरिएको जिल्ला प्रहरी कार्यालय धादिङका निमित्त सूचना अधिकारी प्रहरी निरीक्षक श्यामकुमार बस्नेतले जानकारी दिनुभयो ।

प्रहरीका अनुसार भरतपुर कारागारबाट फरार भएका महेशलाई मंगलबार राति ९ बजे प्रहरी चौकी मलेखुबाट खटिएको टोलीले गजुरी गाउँपालिका-२ फुर्केखोलाबाट पक्राउ गरेको हो ।

उनलाई बाँकी कैद सजाय भुक्तानका भरतपुर कारागार कार्यालय, चितवनमा बुझाइएको प्रहरीले जनाएको छ।

जेनजी आन्दोलनका क्रममा विभिन्न कारागारबाट फरार भएका कैदीबन्दी तथा थुनुवामध्ये हालसम्म १५३ जनालाई पक्राउ गरी सम्बन्धित कारागारमा बुझाइएको प्रहरी निरीक्षक बस्नेतले बताउनुभयो ।