नीलकण्ठ प्रज्ञा प्रतिष्ठानद्वारा मोतिकवि डिल्लीरमण शर्मा अर्याललाई मरणोपरान्त सम्मान, तमू ह्यूल छोंज धीं पनि सम्मानित

धादिङ । नीलकण्ठ प्रज्ञा प्रतिष्ठान धादिङले नेपाली साहित्य र सांस्कृतिक क्षेत्रको संरक्षण तथा प्रवर्द्धनमा योगदान पुर्‍याउने व्यक्तित्व तथा संस्थालाई सम्मान गरेको छ।

प्रतिष्ठानद्वारा आयोजित सांस्कृतिक विमर्श तथा विशेष सम्मान समर्पण समारोहमा धादिङका मोतिकवि स्वर्गीय डिल्लीरमण शर्मा अर्याललाई ‘ललित प्रज्ञाश्री सम्मान-२०८३’ तथा तमू ह्यूल छोंज धीं गुरुङ राष्ट्रिय परिषद् जिल्ला कार्य समिति धादिङलाई ‘धादिङ प्रज्ञा सम्मान-२०८३’ प्रदान गरिएको हो।

नेपाली साहित्यमा दीर्घकालीन योगदान पुर्‍याएको कदरस्वरूप मोतिकवि स्वर्गीय डिल्लीरमण शर्मा अर्याललाई मरणोपरान्त ‘ललित प्रज्ञाश्री सम्मान-२०८३’ प्रदान गरिएको प्रतिष्ठानले जनाएको छ।

उक्त सम्मानअन्तर्गत २० हजार ८३ रुपैयाँ नगद, दोसल्ला र सम्मानपत्र प्रदान गरिएको थियो। सम्मान उनकी धर्मपत्नी विष्णुकुमारी अर्यालसहित परिवारका सदस्यहरूले ग्रहण गरेका थिए।

प्रतिष्ठानका अध्यक्ष बद्रीप्रसाद दाहालले साहित्यिक सिर्जना, संस्थागत नेतृत्व तथा नयाँ पुस्ताका साहित्यप्रेमीलाई प्रेरित गर्ने कार्यको उच्च मूल्याङ्कन गर्दै अर्याललाई सम्मान गरिएको बताउनुभयो।

अर्यालले धादिङको साहित्यिक पहिचान स्थापित गर्न महत्वपूर्ण भूमिका निर्वाह गरेका बताउनुभयो ।

प्रतिष्ठानका सदस्य सचिव प्रकाश पौडेलले स्वर्गीय अर्याल धादिङको साहित्यिक इतिहासमा विशेष स्थान राख्ने स्रष्टा भएको उल्लेख गर्नुभयो।

सिद्धलेक गाउँपालिका-२ आप्रीछापमा १९८८ साल चैत ७ गते जन्मनुभएका अर्यालले साहित्य साधनासँगै शिक्षण तथा साहित्यिक अभियानमार्फत जिल्लाको साहित्यिक वातावरण निर्माणमा योगदान पुर्‍याउनुभएको थियो।

उहाँले २८ भन्दा बढी कृति प्रकाशन गर्नुभएको थियो। साहित्य क्षेत्रमा उल्लेखनीय योगदान पुर्‍याउनुभएको अर्यालको २०७२ साल साउन ४ गते निधन भएको थियो।

कार्यक्रमको अवसरमा भाषा, कला, संस्कृति तथा मौलिक पहिचानको संरक्षण र प्रवर्द्धनमा योगदान पुर्‍याएको भन्दै तमू ह्यूल छोंज धीं गुरुङ राष्ट्रिय परिषद् जिल्ला कार्य समिति धादिङलाई ‘धादिङ प्रज्ञा सम्मान–२०८३’ प्रदान गरिएको छ।

परिषद्लाई २० हजार ८१ रुपैयाँ नगद, दोसल्ला तथा सम्मानपत्रसहित सम्मान गरिएको हो।

सम्मान ग्रहणपछि परिषद्का उपाध्यक्ष श्यामबहादुर गुरुङले प्राप्त सम्मानले गुरुङ समुदायको भाषा, संस्कार, संस्कृति तथा परम्पराको संरक्षणमा थप उत्साह र जिम्मेवारी बोध गराएको बताउनुभयो।

उहाँले यस्ता सम्मानले समुदायलाई आफ्नो मौलिक पहिचान जोगाउन प्रेरणा प्रदान गर्ने उल्लेख गर्नुभयो।

कार्यक्रमका प्रमुख अतिथि नीलकण्ठ नगरपालिकाका प्रमुख तथा नेपाल नगरपालिका संघका अध्यक्ष भीमप्रसाद ढुंगानाले मोतिकवि अर्यालको योगदान धादिङको साहित्यिक क्षेत्रका लागि प्रेरणाको स्रोत बनेको बताउनुभयो।

अर्यालले सिर्जना गरेको साहित्यिक विरासत आगामी पुस्ताका लागि मार्गदर्शक रहने उल्लेख गर्दै प्रतिष्ठानले उहाँको योगदानलाई स्मरणीय बनाएको बताउनुभयो।

नगर प्रमुख ढुंगानाले भाषा, कला र संस्कृति समुदायको पहिचान भएकाले यसको संरक्षण र पुस्तान्तरण आवश्यक रहेको धारणा राख्नुभयो।

उहाँले स्थानीय तहले सांस्कृतिक सम्पदाको संरक्षण र प्रवर्द्धनलाई प्राथमिकतामा राखेर काम गरिरहेको बताउँदै तमू ह्यूल छोंज धीं गुरुङ राष्ट्रिय परिषद् धादिङलाई गरिएको सम्मानले अन्य समुदायलाई पनि आफ्नो भाषा र संस्कृतिको संरक्षणमा सक्रिय बन्न प्रेरित गर्ने विश्वास व्यक्त गर्नुभयो।