नीलकण्ठका ८० युवाले लिए वारिष्टा तालिम

धादिङ । नीलकण्ठ नगरपालिकाले ‘युवासँग उप–प्रमुख कार्यक्रम’ अन्तर्गत ८० जना युवायुवतीलाई एक महिने वारिष्टा (कफी बनाउने) तालिम प्रदान गरेको छ।

नगरपालिकाको आर्थिक सहयोगमा जिनियस सर्भिस नेपाल प्रा.लि. काठमाडौंमार्फत सञ्चालन गरिएको १६० घण्टे तालिम मंगलबार सम्पन्न भएको हो।

तालिममा सहभागी युवाहरूले सीप हासिलसँगै रोजगारी तथा स्वरोजगारका अवसर बढेको बताएका छन्। सहभागीहरूले वारिष्टा सीपले देशभित्र तथा विदेशमा समेत रोजगारीका सम्भावना सिर्जना गर्ने र आफ्नै व्यवसाय सञ्चालन गर्न सहज हुने धारणा व्यक्त गरेका छन्।

समापन कार्यक्रममा नीलकण्ठ नगरपालिकाका नगर प्रमुख भीमप्रसाद ढुंगानाले युवाहरूलाई सीपमूलक तालिमपछि व्यवसाय र स्वरोजगारमा जोडिन आग्रह गर्दै नगरपालिकाले आवश्यक परे लगानीसमेत उपलब्ध गराउने बताउनुभयो । उहाँले विदेश मोहभन्दा देशमै उद्यमशील बन्न युवाहरूलाई प्रेरित गर्नुभएको छ ।

यस्तै उपप्रमुख दीपक विश्वकर्माले युवाको हातमा सीप र गोजीमा आम्दानी पुर्‍याउने उद्देश्यले तालिम सञ्चालन गरिएको उल्लेख गर्दै नगरपालिकाले विभिन्न सीपमूलक कार्यक्रममार्फत युवालाई रोजगारमुखी बनाउने अभियानलाई निरन्तरता दिएको बताउनुभयो ।उहाँले सिकेको सीपलाई व्यवहारमा उतारेर आत्मनिर्भर बन्न सहभागीहरूलाई आग्रह गर्नुभयो ।

नगरपालिकाले आगामी दिनमा पनि युवामैत्री तालिम, उद्यमशीलता विकास तथा स्वरोजगार प्रवर्द्धनका कार्यक्रमलाई प्राथमिकताका साथ अगाडि बढाउने जनाएको छ।