१ लाख ५ हजार पुरस्कार राशीको म्हेन्दोमाया कप फुटबलको टिम दर्ता असोज २३ गतेसम्म

धादिङ । धादिङको सिद्धलेक गाउँपालिका-१ मा आयोजना हुन लागेको दोस्रो सिद्धलेक म्हेन्दोमाया कप-२०८३ ९ ए साइड खुला फुटबल प्रतियोगिताका लागि टिम दर्ता असोज २३ गतेसम्म गर्न सकिने भएको छ।

म्हेन्दो माया युवा समाज, सिद्धलेक गाउँपालिका-१ को आयोजना तथा नयाँबस्ती प्रवासी समाजको सह-आयोजनामा प्रतियोगिता आयोजना हुन लागेको हो।

प्रतियोगिता असोज २४ गतेदेखि २७ गतेसम्म सिद्धलेक गाउँपालिका-१ स्थित नयाँबस्ती बाँझोगरा म्हेन्दोमाया खेलमैदानमा सञ्चालन हुनेछ।

आयोजकका अनुसार प्रतियोगितामा सहभागी हुन चाहने टोलीले असोज २३ गते बेलुका ५ बजेसम्म टिम दर्ता गराउन सक्नेछन्।

टिम दर्ताका लागि ८ हजार ५ सय रुपैयाँ प्रवेश शुल्क तोकिएको छ।

प्रतियोगिताको विजेताले नगद १ लाख ५ हजार रुपैयाँसहित ट्रफी, मेडल र प्रमाणपत्र प्राप्त गर्नेछ।

यस्तै उपविजेता टोलीले ५२ हजार रुपैयाँसहित मेडल र प्रमाणपत्र प्राप्त गर्नेछ भने तेस्रो हुने टोलीले २५ हजार रुपैयाँसहित मेडल र प्रमाणपत्र प्राप्त गर्ने आयोजकले जनाएको छ।

व्यक्तिगत विधातर्फ उत्कृष्ट खेलाडीलाई ५ हजार रुपैयाँसहित मेडल र प्रमाणपत्र प्रदान गरिनेछ।

प्रतियोगिताको सर्वाधिक गोलकर्ता र उत्कृष्ट गोलरक्षकलाई जनही ३ हजार रुपैयाँसहित मेडल र प्रमाणपत्र प्रदान गरिने आयोजकले जनाएको छ।

‘स्वास्थ्यको लागि खेलकुद, राष्ट्रको लागि खेलकुद’ भन्ने मूल नाराका साथ आयोजना हुन लागेको प्रतियोगितालाई व्यवस्थित, भव्य र सभ्य रूपमा सञ्चालन गर्ने तयारी भइरहेको म्हेन्दो माया युवा समाजका अध्यक्ष पेमा छिरिङ लामाले बागमति कलमलाई जानकारी दिनुभयो।

स्थानीयस्तरमा रहेका खेलाडीको प्रतिभा उजागर गर्दै युवालाई खेलकुदतर्फ आकर्षित गर्ने उद्देश्यले प्रतियोगितालाई यस वर्ष पनि निरन्तरता दिइएको अध्यक्ष लामाले बताउनुभयो।

प्रतियोगितामा धादिङलगायत विभिन्न स्थानबाट खेलाडी तथा टोलीको सहभागिता रहने अपेक्षा गरिएको भन्दै उहाँले खेलाडी, खेलप्रेमी तथा स्थानीयवासीलाई प्रतियोगितामा सहभागी भई सफल बनाउन सहयोग गर्न आग्रह गर्नुभएको छ।

फुटबल प्रतियोगितासँगै सांस्कृतिक कार्यक्रमसमेत आयोजना गरिने आयोजकले जनाएको छ।

गत वर्ष सोही खेलमैदानमा प्रथम सिद्धलेक म्हेन्दोमाया कप असोज ६ गतेदेखि ९ गतेसम्म सञ्चालन भएको थियो।

प्रतियोगिताबारे थप जानकारी तथा टिम दर्ताका लागि ९७६३२४०६७४, ९८६३२०८७०१, ९८६९३७८१२४, ९७६३७७२३२३ र ९७६३६८५१५५ मा सम्पर्क गर्न सकिनेछ।