१५ गतेदेखि नागढुङ्गा सुरुङ मार्गमा टोल शुल्क उठाइने

धादिङ। कात्तिक १५ गतेदेखि नागढुङ्गा सुरुङ मार्ग प्रयोग गर्ने सवारीसाधनबाट सडक उपभोग दस्तुर (टोल शुल्क) सङ्कलन सुरु गरिने भएको छ।

सडक बोर्ड नेपालको कार्यकारी समितिको असोज १२ गतेको निर्णय तथा नेपाल राजपत्रमा २०७२ चैत २६ गते प्रकाशित सूचना बमोजिम यो शुल्क उठाउन लागिएको नागढुङ्गा सुरुङ मार्ग निर्माण आयोजनाले जनाएको छ।

यस व्यवस्थाअनुसार सवारीसाधनका विभिन्न वर्ग छुट्याइएको छ। कार, भ्यान, पिकअप, ट्र्याक्टर, माइक्रो बस र अन्य हलुका सवारीसाधनले काठमाडौँ प्रवेश गर्दा ६५ रुपैयाँ र काठमाडौँबाट प्रस्थान गर्दा ६० रुपैयाँ तिर्नुपर्नेछ।

त्यसैगरी, मिनी बस र मिनी ट्रिपस वा ट्रकका लागि काठमाडौँ प्रवेश गर्दा १ सय १५ रुपैयाँ र प्रस्थान गर्दा ८० रुपैयाँ निर्धारण गरिएको छ।

सिङ्गल रियर एक्ससल भएका बस तथा ट्रकहरूले काठमाडौँ प्रवेश गर्न २ सय ६० रुपैयाँ र प्रस्थान गर्न २ सय रुपैयाँ बुझाउनुपर्नेछ भने मल्टि एक्ससल ट्रक, अन्य भारी सवारी साधन र भारी उपकरणहरूका लागि काठमाडौं प्रवेश गर्दा ६ सय रुपैयाँ र प्रस्थान गर्दा २ सय ५० रुपैयाँ शुल्क तोकिएको छ।