धादिङमा बालिका बलात्कारका आरोपी एक किशोरलाई १२ वर्ष कैद,४ लाख ६६ हजार जरिवाना

अडियोमा सुन्नुहोस

धादिङ । जिल्ला अदालत धादिङले बालिका बलात्कार गरेको कसुरमा एक किशोरलाई १२ वर्ष कैद र रु ४ लाख भन्दा बढि जरिवाना गर्ने फैसला गरेको छ।

१४ वर्षीया बालिकालाई बलात्कार गर्ने १७ वर्षीय किशोरलाई जिल्ला न्यायधिस गोपाल प्रसाद बास्तोलाको इजलासले असार ९ गते कसुर कायम गरी असार १७ गते सजाय निर्धारण गरेको जिल्ला अदालतका श्रेस्तेदार माधव भण्डारीले जानकारी दिनुभयो ।

कसुरदारलाई १२ वर्ष कैद गरी ४ लाख ६६ हजार ६ सय ६७ रुपैयाँ जरिवाना गर्ने र सोही रकम पीडितलाई क्षतिपुर्ति दिने फैसलामा उल्लेख छ ।

कसुरदारले ०८० चैत १ गते नाबालिकालाई नीलकण्ठ नगरपालिका–८ मा बलात्कार गरेको भन्दै पीडित पक्षले ०८० चैत ७ गते आरोपितलाई कारबाही गर्न माग गर्दै जिल्ला प्रहरी कार्यालय धादिङमा उजुरी दिइएको थियो ।

उक्त किशोरलाई जिल्ला प्रहरी कार्यालयले ०८० चैत ७ गते गिरफ्तार गरेको थियो ।

पीडितको धादिङ अस्पतालमा चैत ७ गते स्वास्थ्य परीक्षण भएको थियो ।जिल्ला अदालतमा ०८० चैत २८ गते दर्ता भएको मुद्दाका कसुरदार बालकलाई जिल्ला अदालतको आदेशले बालसुधार गृह भक्तपुरमा राखिएको छ ।