रातोमाटेबाट २२३ केजी गाँजासहित धादिङका दुई युवक पक्राउ

अडियोमा सुन्नुहोस

धादिङ । मकवानपुरको हेटौंडा उपमहानगरपालिका-१५ रातोमाटेबाट २ सय २३ किलोग्राम अवैध लागूऔषध गाँजासहित २ जना पक्राउ परेका छन् ।

पक्राउ पर्नेहरूमा धादिङ थाक्रे गाउँपालिका-४ बस्ने ३४ वर्षीय जिबन मगर र सोही गाउँपालिका-६ महादेबबेशी बस्ने ३० वर्षीय प्रदिप क्षेत्री रहेका छन् ।

आइतबार बिहान प्रहरी चौकी रातोमाटेबाट खटिएको प्रहरीले हेटौंडाबाट पथलैयातर्फ जाँदै गरेको बा.२१ च ५२२६ नम्बरको पिकअपलाई जाँच गर्ने क्रममा उक्त परिमाणको गाँजा फेला पारी चालक जिबन र पिकअपमा सवार प्रदिपलाई पक्राउ गरेको प्रहरीले जनाएको छ।

यस सम्बन्धमा प्रहरीले आवश्यक अनुसन्धान गरिरहेको छ।