धादिङमा बलात्कार कसुरमा एक जनालाई ७ वर्ष १ महिना कैद,३ लाख जरिवाना

धादिङ । जिल्ला अदालतले धादिङले बलात्कार कसुरमा एक जनालाई सात वर्ष १ महिना कैद सजायको फैसला सुनाएको छ।

न्यायाधीश मनकुमारी जिएम बिकको असोज १५ गतेको इजलासले ५१ वर्षीया महिलालाई बलात्कार गरेको कसुरमा धुनीबेसी नगरपालिका-२ का ३८ वर्षीय सन्तोष रम्तेललाई ७ वर्ष १ महिना कैदको फैसला सुनाएको अदालतका श्रेस्तेदार माधव भणडारीले जानकारी दिनुभयो ।

कसुरदार ठहरिएका रम्तेललाई ३ लाख जरिवाना, पीडित राहत कोषमा १२ हजार तिर्नुपर्ने र पीडितलाई २ लाख क्षतिपूर्ति दिनुपर्ने फैसला भएको श्रेस्तेदार भणडारीले बताउनुभयो ।

पीडित पक्षले ०८१ जेठ १४ गते आरोपितले बलात्कार गरेको भन्दै जेठ २९ गते उजुरी दिएको थियो ।

जिल्ला प्रहरी कार्यालयले रम्तेलविरुद्ध जिल्ला सरकारी वकिलमार्फत ०८१ असार १८ गते जबरजस्ती करणी शीर्षकमा मुद्दा दर्ता गरेको थियो ।