धादिङमा बढी भाडा लिने र भाडादर नटाँस्ने सवारीलाई ३० हजार जरिवाना (भिडियो सहित)

धादिङ । धादिङमा तोकिएको भन्दा बढी भाडा लिने र भाडादर नटाँस्ने सवारी साधन कारवाहीमा परेका छन् ।

जिल्ला अनुगमन समिति धादिङले सार्वजनिक सवारी साधनमा भाडादरको विवरण नराख्ने र बढी भाडा लिने दुई सवारी साधनलाई जरिवाना तिराएको छ ।

बुधबार प्रमुख जिल्ला अधिकारी सुमन घिमिरेको नेतृत्वको अनुगमन टोलीले धादिङबेशी काठमाडौँ चल्ने ग्रामिण यातायात धादिङ प्रा.लि.को बा ५ ख ५७ नम्बरको बसमा भाडादर टाँसेको नभेटिएपछी १० हजार जरिवाना तिराएको छ ।

यस्तै काठमाडौँबाट चितवन तर्फ जाँदै गरेको लामा ट्राभल्सको ग १ ख ५५९२ नम्बरको माइक्रोले यात्रुसँग बढी भाडा लिएको भेटिएपछि २० हजार जरिवाना तिराएको छ ।

पाँच सय ५० तोकिएको भाडामा उक्त माइक्रोले प्रतिव्यक्ति एक हजार रुपियाँ भाडा लिएको गुनासो आएपछि जिल्ला अनुगमन समितिले बेनिघाट बजारमा रोकेर सबै यात्रुहरूको भाडा फिर्ता गराएको छ ।

दसैँ, तिहार लगायतको पर्वका लागि आवत जावत गर्ने यात्रुहरूसँग बढी भाडा लिनसक्ने भन्दै प्रमुख जिल्ला अधिकारी सुमन घिमिरे पृथ्वी राजमार्ग अन्तरगत जिल्लाको विभिन्न ठाउँमा छड्के चेकपोष्ट राख्ने बताउनुभएको छ ।

हेर्नुहोस् भिडियो……….