सिद्धलेकको सिम्लेमा एक बृद्धा मृत फेला,हत्या आशंकामा एक जना पक्राउ

धादिङ । धादिङको सिद्धलेक गाउँपालिका–६ कुम्पुरभञ्ज्याङ्गस्थित सिम्लेमा मृत भेटिएकी बृद्धाको हत्या भएको आशंका गरिएको छ ।

गएराती सोही ठाउँकी ८६ बर्षिया सुन्तली घले घर भन्दा करिब ५०/६० मिटर पर मृत अवस्थामा भेटिएको स्थानिय रामकुमार श्रेष्ठले बागमती कलमलाई जानकारी दिनुभयो ।

मृतकको आँखा भन्दा माथि ठुलो चोट भएकाले हत्या गरिएको हुन सक्ने प्रहरीले जनाएको छ।

उक्त घटनामा शङ्कास्पद एक जनालाई प्रहरीले नियन्त्रणमा लिएको छ ।उक्त व्यक्तिलाई प्रहरीले सार्वजनिक भने गरेको छैन।

ति व्यक्तिलाई नीलकण्ठ नगरपालिका–८ ससाह नजिकैबाट नियन्त्रणमा लिई ईलाका प्रहरी कार्यालय गजुरी पठाईएको जिल्ला प्रहरी कार्यालय धादिङका सूचना अधिकारी प्रहरी निरिक्षक प्रल्हाद सिलवालले जानकारी दिनुभयो ।

मृतकको शव पोष्टमार्टमका लागि काठमाडौँस्थित त्रिवि शिक्षण अस्पताल (टिचिङ) महाराजगंज पठाइएको प्रहरीले जनाएको छ।

प्रहरीले घटनाको गम्भीररुपमा अनुसन्धान गरिरहेको बताएको छ।