बजार अनुगमन : धादिङको एक होटललाई २० हजार जरिवाना (भिडियो सहित)

धादिङ । धादिङमा बजार अनुगमनलाई तिव्र पारिएको छ ।

चाडपर्वको समयमा बजारमा धेरै सामान खरिद गर्ने तथा उपभोक्ता ठगिने जोखिमलाई ध्यानमा राखेर जिल्ला अनुगमन समिति धादिङले धादिङका होटल तथा खाद्यान्न पसलहरुमा अनुगमन कार्यलाई तिव्रता दिएको छ ।

अनुगमनका क्रममा समितिले बुधबार पृथ्वी राजमार्गअन्तर्गत बेनिघाट रोराङ गाउँपालिका ३ मा सञ्चालित पिस हेभन रेष्टुरेन्ट एण्ड गेष्ट हाउस एण्ड रिसोर्टलाई २० हजार जरिवाना तिराएको छ ।

प्रमुख जिल्ला अधिकारी सुमन घिमिरेको नेतृत्वमा गएको अनुगमन समितिले उक्त रिसोर्टलाई जरिवाना तिराएको हो ।

कारबाहीमा परेको रिसोर्टले सरसफाईमा ध्यान नदिएको, खानेकुरा छोपेर नराखेको, खानामा झिँगा भन्किएको भेटिएपछी उपभोक्ता संरक्षण ऐन २०७५ को उपदफा ३९ को १ को क अनुसार जरिवाना तिराइएको प्रमुख जिल्ला अधिकारी घिमिरेले बताउनुभयो।

पुनः यस्तो भेटिएमा कानुन बमोजिम कारवाही हुने उहाँले बताउनुभयो ।

अनुगमनमा जिल्ला प्रहरी कार्यालयका प्रमुख प्रहरी उपरिक्षक दिपेन्द्र शाही, उद्योग तथा वाणिज्य कार्यालयका प्रमुख चुणामणी पुरी, पत्रकार महासंघका अध्यक्ष राजाराम शर्मा र उपभोक्ता मन्च नेपालका अध्यक्ष शिवराज सापकोटा सहभागी हुनुहुन्थ्यो ।

यस्तै सहायक प्रमुख जिल्ला अधिकारी एवम जिल्ला अनुगमन समितिका संयोजक युवराज अर्याल सहितको टोलिले आदमघाटमा सञ्चालित खाद्यान्न पसलहरुमा अनुगमन गरेको छ ।

अनुगमनका क्रममा व्यवसायीहरुलाई सचेत गराइएको र कार्यविधि अनुसार बिक्री गर्न निर्देशन दिईएको बताउनुभयो ।

जिल्लाका विभिन्न स्थानमा अखाद्य वस्तुको बिक्री भएको; तोकिएको मूल्यभन्दा बढी रकम लिएको र सरसफाइमा ध्यान नदिएको भन्ने गुनासो आएपछि बजार अनुगमनलाई तीव्रता अर्यालले बताउनुभयो ।

चाडपर्वको बेलामा उपभोक्तासँग बढी मूल्य लिने, गुणस्तरहीन वस्तु, म्याद नाघेका सामान, लेबल नभएका सामान विक्री गर्नेलगायतका कार्य बढी हुने भएकाले अनुगमन तीव्र पारिएको उहाँको भनाई छ ।

चाडपर्वको मौका छोपेर विशेष त पृथ्वी राजमार्गअन्तर्गत धादिङ जिल्लामा सञ्चालित होटलहरूले खाना, खाजाको मूल्य बढी लिने गरेको यात्रुहरूले गुनासो गर्दै आइरहेका छन् ।

हेर्नुहोस् भिडियो……….