अनुगमन जारी धादिङबेसीको ए वान बेकरीलाई २० हजार जरिवाना

धादिङ। धादिङमा बजार अनुगमन जारी छ।

नागरिकहरुको गुनासोको आधारमा जिल्ला अनुगमन समितिले जिल्लाभर अनुगमनलाई तिव्र पारेको छ।

आईतबारप्रमुख जिल्ला अधिकारी सुमन घिमिरे नेतृत्वको जिल्ला अनुगमन समितिले धादिङबेसीको ए वान बेकरी उद्योगलाई २० हजार रुपैयाँ जरिवाना तिराएको छ।

अनुगमनको क्रममा बेकरीमा फोहर सडेको सामाग्री भएको फेला परेपछि जरिवाना गरिएको प्रजिअ घिमिरेले बताउनुभयो ।

आकस्मिक अनुगमन गर्दा सरसफाई अत्यन्त कमजोर, भण्डार कोठामा साङ्ला लगायतका किरा, दुईवटा खाद्यान्न सामान म्याद गुज्रेको, फ्रिजमा कतिपय सामान खुला रुपमा राखेको, खुला रुपमा झिंगा भन्किएको भेटेपछी सुझाव सहित कारबाही स्वारुप जरिवाना गरिएको उद्योग तथा वाणिज्य कार्यालयका प्रमुख चुडामणि पुरीले जानकारी दिनुभयो ।

बेकरी संचालन मापदण्ड अनुसार गुणस्तर कायम गरेर मात्र उद्योगलाई संचालन गर्न अनुगमनका क्रममा सुझाव दिईएको छ ।

चाडपर्वको समयमा बजारमा पाइने सामानहरुको अत्याधिक मूल्य लिने, उपभोक्ता ठगिने कारणले नागरिकहरु समस्यामा पर्ने भएपछि नागरिकहरुको आग्रह र उजुरीको आधारमा निरन्तर अनुगमन भइरहेको छ।