नेविसंघ धादिङमा विवाद : अधिकारी समूहले बनायो समानान्तर कमिटी

धादिङ । नेपाली कांग्रेसको भ्रातृ संगठन नेपाल विद्यार्थी संघ (नेविसंघ) धादिङमा समानान्तर कमिटी गठन भएको छ ।

आइतबार कांग्रेस पार्टी कार्यालयमा एक कार्यक्रम गरी कांग्रेस धादिङका सभापती एवम् नेपाल सरकारको कृषिमन्त्री रामनाथ अधिकारी पक्षका दिनेश श्रेष्ठको अध्यक्षतामा समानान्तर कमिटी गठन गरिएको हो।

नेविसंघ केन्द्रीय समितिबाट यसअघि नै आधिकारिक टिकट ल्याएर जिल्लामा विभिन्न गतिविधि गर्दै आएका सुदीप गौलीलाई अध्यक्ष स्वीकार गर्न नसक्ने भन्दै असन्तुष्ट पक्षहरुले समानान्तर कमिटी बनाएका हुन् ।

आइतबार गठन भएको समानान्तर कमिटीका अध्यक्ष श्रेष्ठ कांग्रेस अधिकारी पक्षका हुन् भने नेविसंघ केन्द्रीय समितिबाट टिकट ल्याएका सुदीप गौली कांग्रेस जिल्ला अधिवेशनमा सभापतीका प्रत्यासी एवम् नीलकण्ठ नगरपालिकाका मेयर भीम प्रसाद ढुंगाना पक्षका हुन्।

नेविसंघका केन्द्रीय अध्यक्ष दुजाङ शेर्पाले २०७९ फागुन १८ गते तीन महिनाभित्र जिल्ला अधिवेशन सक्ने गरी गौलीलाई अध्यक्षमा नियुक्त गर्नुभएको थियो ।

कांग्रेस जिल्ला कार्य समितिसँग नेविसंघ केन्द्रीय कमिटीले अध्यक्षका लागि तीन जनाको नाम सिफारिस गर्न माग गरेको थियो । जिल्लाले नाम पठाउन नभ्याउँदै शेर्पाले गौलीलाई जिल्ला अध्यक्ष पदमा नियुक्ति गरेको पत्र पठाउनुभएको थियो ।

नेपाली कांग्रेस जिल्ला कार्यसमितिको सिफारिस बिना नेविसंघ केन्द्रबाट गुुटगत आधारमा गौलीको नाम पढाएको भन्दै कांग्रेस जिल्ला कार्यसमितिले स्वीकार गरेको थिएन ।

केन्द्रीय कमिटिले जिल्ला अध्यक्षमा हस्तक्षेप गर्न नहुने र भूगोलमा चुनाव हुनुपर्ने माग गरी असन्तुष्ट पक्षले गौली नेतृत्वमा हुँदै आएका गतिविधिहरु समेत अस्वीकार गर्दै आएका थिए ।

केही दिन अघि भएको एसईइ उत्तीर्ण विद्यार्थी सम्मान कार्यक्रममा पनि श्रेष्ठका पक्षधरहरु सहभागी थिएनन् ।