एनपीएलमा आज लिगको अन्तिम खेल: जनकपुर र कर्णाली खेल्दै

काठमाण्डौ । नेपाल प्रिमियर लिग (एनपीएल) मा आज लिग चरणको अन्तिम खेलमा जनकपुर बोल्ट्स र कर्णाली याक्स खेल्दैछन् ।

खेल दिउँसो साढे ३ बजे कीर्तिपुरको त्रिवि क्रिकेट रङ्गशालामा शुरु हुनेछ ।

अङ्क तालिकाको पुछारका यी दुई टोली प्ले अफ समीकरणबाट बाहिरिसकेका छन् । यो खेल प्रतिष्ठाको लागि मात्रै हुनेछ ।

६ खेलमा एउटा मात्रै खेल जितेको कर्णाली सातौं स्थानमा छ भने समान खेलमा एउटा मात्रै खेल जितेको साविक विजेता जनकपुर तालिकाको पुछारमा छ ।

क्वालिफायर र इलिमिनेटर समीकरण पूरा भएको छ । अब क्वालिफायरमा शीर्ष स्थानमा रहेको सुदूरपश्चिम रोयल्स र दोस्रो स्थानमा रहेको विराटनगर किङ्ग्सबीच खेल हुनेछ ।

यस्तै इलिमिनेटरमा तेस्रो स्थानको काठमान्डु गोखार्ज र चौथो स्थानको लुम्बिनी लायन्सबीच खेल हुनेछ ।

गएको मङ्सिर १ देखि शुरू भएको दोस्रो संस्करणको एनपीएलको फाइनल खेल यही २७ गते हुनेछ ।

प्रतियोगितमा ८ वटा टोली सहभागी छन् । filephoto