समृद्ध नेपाल,सुखी नेपालीको अभिभारा पुरा गर्न एमालेले जित्नु पर्छ : उम्मेदवार त्रिपाठी

धादिङ । समृद्ध नेपाल,सुखी नेपालीको अभिभारा पुरा गर्न एमालेले जित्नुपर्ने भूमि त्रिपाठीले बताउनुभएको छ ।

आसन्न फागुन २१ गते हुने प्रतिनिधि सभा सदस्य निर्वाचनका लागि धादिङ निर्वाचन क्षेत्र नम्बर १ मा नेकपा एमालेबाट उम्मेदवारी दिनुभएका भूमि त्रिपाठीले रोजगारी, विकास र आत्मनिर्भर अर्थतन्त्र निर्माणका लागि पहल गर्ने बताउनुभएको छ ।

शुक्रबार धादिङको थाक्रे गाउँपालिका वडा नम्बर २, ६ र ११ नम्बर वडाका टोल तथा बस्तीहरुमा मतदाता भेटघाट गर्दै एमाले उम्मेदवार त्रिपाठीले समृद्ध नेपाल सुखी नेपालीको अभिभारा पुरा गर्नका लागि एमालेले जित्नु पर्ने बताउनुभयो ।

जनताका समस्या भनेको सिंचाइ सुविधा नहुनु, सफा खानेपानी नहुनु,  कृषि उत्पादनले बजार नपाउनु र रोजगारी अभाव भएकोले यसको समस्या समाधान गर्न निति कानूनबाटै नागरिकको हितमा काम गर्ने उहाँले बताउनुभयो ।

एमाले उम्मेदवार त्रिपाठी घरदैलो भेटघाट गर्दै महादेबबेसी, रानीबारी, बालुवाफाँट, चण्डीस्थान, मानखुटार, बाह्र किला लगायतका स्थानमा कोणसभा समेत गरिएको थियो ।

कृषीलाई बजारीकरण समेत गर्ने गरि व्यवसायीकरण गर्ने, शिक्षा र स्वास्थ्य नागरिकको अधिकार सुनिश्चित गर्ने, बेरोजगारलाई रोजगारी दिने किसिमको निति ल्याउने त्रिपाठीले बताउनुभयो ।