शिवरात्री अवसरमा भोलि सिद्धलेक नलाङमा मिनि म्याराथुन दौड प्रतियोगिता हुँदै

धादिङ । धादिङको सिद्धलेक गाउँपालिका-२ नलाङमा मिनि म्याराथुन दौड प्रतियोगिता आयोजना हुने भएको छ।

“धार्मिक एवं ऐतिहासिक स्थलहरुको संरक्षण र पर्यटन प्रवर्धनमा युवाहरु” भन्ने मूल मन्त्रका साथ चक्रदेवी सामुदायिक समाज, नेपालको आयोजनामा तथा द यिअर्ली ट्रष्ट, नलाङ मोडेल एकेडेमी र नेपाल एडुमेडिक ट्राभल एण्ड ट्रेकिङ कम्पनीको संयोजनमा ३ गते शिवरात्री पर्वको पावन अवसरमा दौड प्रतियोगिता सञ्चालन गर्न लागिएको हो।

धार्मिक तथा ऐतिहासिक स्थलहरूको संरक्षण र पर्यटन प्रवर्धनमा युवाहरूलाई सक्रिय बनाउने उद्देश्यका साथ वि.सं. २०६५ सालदेखि वार्षिक रूपमा निरन्तर मिनि म्याराथुन आयोजना हुँदै आएको छ।

यो मिनि म्याराथुन फागुन ३ गते आइतबार बिहान ठीक ७:३० बजे सुरु हुनेछ। दौड प्रतियोगिता सिद्धलेक गाउँपालिका-२ स्थित नलाङ ठाँटी भञ्ज्याङबाट सिद्धबाबा मन्दिरसम्म सञ्चालन गरिने आयोजकले जनाएको छ।

प्रतियोगितामा चार समूहमा प्रतिस्पर्धा गराइनेछ।

जसअन्तर्गत १५ वर्षभन्दा माथिका पुरुष र महिला तथा १५ वर्षभन्दा मुनिका छात्र र छात्राले सहभागिता जनाउन सक्नेछन्।

प्रतियोगिताका विजेताहरूलाई प्रथम, द्वितीय, तृतीय तथा सान्त्वना स्थान हासिल गर्ने सहभागीलाई नगद पुरस्कार, प्रमाणपत्र र मेडल प्रदान गरिनेछ।

साथै, सबै सहभागीलाई जर्सी वितरण गरिनुका साथै मन्दिर प्राङ्गणमा नास्ताको व्यवस्था पनि गरिने आयोजकले जानकारी दिएको छ।

प्रतियोगितामा सहभागिता जनाउन इच्छुकहरूले नलाङ मोडेल एकेडेमीमार्फत सम्पर्क गर्न सक्नेछन्।

सम्पर्क नम्बरहरू: ९८४३०५०१४४, ९८४६०४१७१८ र ९८६१३७७६२२