धादिङमा होटल व्यवसायहरू राति ८ बजेसम्म मात्र सञ्चालन गर्न पाइने

धादिङ । आसन्न प्रतिनिधि सभा सदस्य निर्वाचन, २०८२ को सुरक्षालाई ध्यानमा राख्दै जिल्ला प्रशासन कार्यालय धादिङले जिल्लाभित्र सञ्चालन हुने सम्पूर्ण होटल व्यवसायका लागि समयसीमा तोकेको छ।

प्रशासनले एक सूचना जारी गर्दै फागुन १६ गतेदेखि अर्को निर्णय नभएसम्म जिल्लाभर सञ्चालन हुने सबै होटल व्यवसायहरू राति ८ बजेसम्म मात्र सञ्चालन गर्न पाइने जनाएको छ।

उक्त समयपछि होटल व्यवसाय बन्द गर्न तथा गराउन सम्बन्धित सबै सरोकारवालालाई अनुरोध गरिएको छ।

निर्वाचनलाई स्वच्छ, निष्पक्ष, पारदर्शी, भयरहित र मर्यादित वातावरणमा सम्पन्न गराउने उद्देश्यले सुरक्षा संवेदनशीलतालाई ध्यानमा राखी उक्त निर्णय गरिएको सहायक प्रमुख जिल्ला अधिकारी मोहन प्रसाद न्यौपानेले बताउनुभयो ।