देशका धेरै ठाउँमा खाना पकाउने ग्यासको अभाव

काठमाण्डौ । अहिले देशका धेरै ठाउँमा खाना पकाउने ग्यासको अभाव देखिएको छ ।

उपभोक्ताहरू सिलिन्डर लिएर पसल धाइरहेका छन् तर दुई हप्ताभन्दा बढी समयदेखि ग्यास आपूर्ति नभएको स्टोर सञ्चालकहरू बताउँछन् ।

पश्चिम एसियाको तनावबाट त्रसित उपभोक्ताहरूले एक घरमा चार–पाँचवटासम्म सिलिन्डर भण्डारण गर्दा अभाव देखिएको नेपाल आयल निगमका प्रमुख कार्यकारी अधिकृत चण्डिकाप्रसाद भट्टको दाबी छ ।

अहिले भारतबाट दैनिक १०५ देखि ११० वटा ग्यास बुलेट नेपाल भित्रिरहेका छन्, जुन सामान्यभन्दा बढी हो । निगमले ग्यास विक्रेताहरूलाई आपूर्ति विवरण अनिवार्य बुझाउन निर्देशन दिएको छ र बढी मूल्यमा बेच्नेविरुद्ध वाणिज्य विभागमार्फत कारबाही अघि बढाउने तयारी छ ।

अमेरिका–इजराइलको आक्रमणपछि इरानले होर्मुज मार्ग अवरोध गरेको र तेल प्रशोधन क्षेत्रमा आक्रमण बढेपछि विश्वभर पेट्रोलियम पदार्थको भाउ र माग बढेको छ ।

भारतले घरेलु सिलिन्डर बुकिङ अवधि २१ बाट २५ दिन पुर्‍याएपछि नेपाल आपूर्ति घट्ने शङ्का उठेको छ ।

तर निगमका प्रवक्ता मनोज ठाकुर भारतले मागअनुसार ग्यास उपलब्ध गराउने जनाएकाले तत्काल समस्या नआउने बताउनुहुन्छ ।

भारतमा एक दिनमा खपत हुने ग्यास नेपालका लागि एक वर्ष पुग्ने भएकाले आपूर्ति कटौतीको सम्भावना कम रहेको उहाँको विश्वास छ ।