Gen-Z आन्दोलनका क्रममा फरार एक बन्दी धादिङबाट पक्राउ

धादिङ । नख्खु कारागारबाट Gen-Z आन्दोलनका क्रममा फरार भएका एक बन्दीलाई प्रहरीले धादिङबाट पक्राउ गरेको छ।

ज्यान मार्ने उद्योग मुद्दामा कैद सजाय भुक्तान गरिरहेका रुवी भ्याली गाउँपालिका-५ का २८ वर्षीय दिपेश तामाङ (मेम्बर) लाई नीलकण्ठ नगरपालिका-३ बिचबजारबाट मंगलबार पक्राउ गरिएको जिल्ला प्रहरी कार्यालय धादिङले जनाएको छ ।

उनलाई पक्राउ गरी बाँकी कैद सजाय भुक्तानका लागि पुनः नख्खु कारागार पठाइएको जिल्ला प्रहरी कार्यालय धादिङका प्रवक्ता तथा सूचना अधिकारी प्रहरी नायब उपरीक्षक प्रकाश दाहालले जानकारी दिनुभयो ।

तामाङ ज्यान मार्ने उद्योग मुद्दामा १ वर्ष ६ महिना कैद तथा १० हजार रुपैयाँ जरिवानाको सजाय भुक्तान गरिरहेका थिए।

Gen-Z आन्दोलनका क्रममा विभिन्न कारागारबाट फरार भएका कैदीबन्दी तथा थुनुवामध्ये हालसम्म १४९ जनालाई पक्राउ गरी सम्बन्धित कारागारमा बुझाइएको प्रहरीले जनाएको छ।