७ वर्ष बित्दा पनि बनेन रातमाटे-आरुबासटार जोड्ने पुल

धादिङ । बेनिघाट रोराङ गाउँपालिका-३ मलेखु रातमाटे र सिद्धलेक गाउँपालिका-४ आरुबासटार जोड्ने त्रिशूली नदीमाथिको पक्की पुल निर्माण काम लामो समयदेखि अलपत्र परेको छ।

निर्धारित समयमै सम्पन्न गर्ने लक्ष्यसहित सुरु गरिएको पुल सात वर्ष बितिसक्दा पनि प्रारम्भिक चरणमै सीमित रहँदा स्थानीयवासी आक्रोशित बनेका छन्।

पुल निर्माणको ठेक्का २०७५ जेठ २७ गते महाबीर–नीलकगिरी–नेशनल जेभीले करिब १७ करोड ११ लाख रुपैयाँमा लिएको थियो।

सम्झौताअनुसार २०७७ जेठ २६ भित्र निर्माण सम्पन्न गर्नुपर्ने थियो।

तीन स्पानमा १४० मिटर लम्बाइको पुल बनाउने योजना रहे पनि हालसम्म नदी किनारमा जग खन्ने कामबाहेक उल्लेख्य प्रगति हुन सकेको छैन।

स्थानीयका अनुसार आरुबासटारतर्फको भागमा केही जग पुरिएको छ भने नदीको बीचभागका दुईवटा पिलर निर्माण सुरु नै गरिएको छैन।

मलेखुतर्फ पनि प्रारम्भिक संरचना मात्र देखिन्छ।

निर्माण कम्पनीले लामो समयसम्म काम नगरेपछि गाउँबासीले पटक–पटक गुनासो गरे पनि सुधार नआएको उनीहरूको भनाइ छ।

यो पुल निर्माण भएपछि सिद्धलेक-४ का बासिन्दालाई पृथ्वी राजमार्गसँग प्रत्यक्ष पहुँच हुने अपेक्षा गरिएको थियो। साथै, किसानले उत्पादन गरेका तरकारी, फलफूल तथा खाद्यान्न सहज रूपमा बजारसम्म पुर्‍याउन सक्ने विश्वास गरिएको थियो।

तर निर्माण ढिलाइका कारण स्थानीयको दैनिकी अझै कठिन बनेको छ।

तत्कालीन प्रतिनिधिसभा सदस्य भूमि त्रिपाठीले २०७५ पुस ३० गते पुलको शिलान्यास गरेका थिए।

सोही समयमा निर्माण व्यवसायीले समयमै काम सक्ने प्रतिबद्धता जनाएका थिए। तर काममा देखिएको लापरवाहीका कारण परियोजना अलपत्र परेको छ।

पुल सेक्टर काठमाडौंका अनुसार निर्माण कम्पनीलाई पटक–पटक म्याद थप गरिएको थियो। पछिल्लो पटक २०८१ असार ३० सम्म समय दिइएको भए पनि त्यसपछि पनि उल्लेख्य प्रगति देखिएको छैन।

इन्जिनियर राजेन्द्र महर्जनले निर्माण व्यवसायीले विश्वासिलो ढंगले काम गरे मात्र भुक्तानी प्रक्रिया अघि बढ्ने बताउनुभयो।

हाल ठेक्काको म्याद सकिइसकेको छ। निर्माण स्थलमा कहिलेकाहीँ मेसिन राखेर काम भइरहेको जस्तो देखाए पनि वास्तविक प्रगति नभएको स्थानीयको आरोप छ।

निर्माण व्यवसायी युवराज डाँगीसँग सम्पर्क गर्न खोज्दा प्रतिक्रिया प्राप्त हुन सकेको छैन। लामो समयदेखि पुल निर्माण नहुँदा स्थानीयवासीले राज्यको ध्यानाकर्षण गराउँदै शीघ्र काम सम्पन्न गर्न माग गरेका छन्।